დღეს, 30 ნოემბერს, პარლამენტში 2011 წლის ბიუჯეტის პროექტის საბოლოო ვარიანტი უნდა შევიდეს. ამის შესახებ "ჯი-ეიჩ-ენს" ფინასთა მინისტრის პირველმა მოადგილემ პაპუნა პეტრიაშვილმა განუცხადა.
"2011 წლის ბიუჯეტის, საბოლოო, გადამუშავებული ვარინტი, რომელშიც პარლამენტის მიერ გამოთქმული შენიშვნებია გათვალისწინებული, პარლამენტს 30 ნოემბრამდე გადაეგზავნება", - აღნიშნა პეტრიაშვილმა.
რეგლამენტის თანახმად, ბიუჯეტის საბოლოო ვარიანტი დამტკიცდება პარლამენტის უმრავლესობის მიერ, პარლამენტის საშემოდომო სესის დასრულებამდე, არა უგვიანეს დეკემბრის მესამე პარასკევისა.
2011 წლის ბიუჯეტის პროექტი პარლამენტში პირველად 1-ელ ოქტომბერს შევიდა, თუმცა მას შემდეგ, რაც ის განსახილველად მთავრობას დაუბრუნდა, ბიუჯეტი გაიზარდა და ახლა 6 მლრდ 60 მილიონის ნაცვლად, 7 მილიარდ 88 მლნ ლარია.
2011 წლის ნაერთი ბიუჯეტის შემოსავლების საპროგნოზო მაჩვენებელი განისაზღვრა 6 357.7 მლნ ლარით და მისი ფარდობითი მაჩვენებელი მთლიანი შიდა პროდუქტის მიმართ შეადგენს 27.8 პროცენტს. ეკონომიკური ზრდა 4,5%-ია ნავარაუდევი.
წლის სახელმწიფო ბიუჯეტის შემოსავლების საპროგნოზო მაჩვენებელი 5 946.6 მლნ ლარით, ხოლო ბიუჯეტის გადასახადების საპროგნოზო მაჩვენებელი 5 300.0 მლნ ლარით განისაზღვრა, რაც მთლიანი შიდა პროდუქტის 23.2 პროცენტს შეადგენს.
2011 წლის სახელმწიფო ბიუჯეტის ხარჯები შეადგენს 5 800.5 მლნ ლარს, მათ შორის: შრომის ანაზღაურება _ 1 089.8 მლნ ლარი; საქონელი და მომსახურება _ 793.0 მლნ ლარი; პროცენტი _ 314.4 მლნ ლარი; სუბსიდიები _ 233.4 მლნ ლარი; გრანტები _ 995.0 მლნ ლარი; სოციალური უზრუნველყოფა _ 1 475.7 მლნ ლარი; სხვა ხარჯები _ 899.4 მლნ ლარი.