საქართველოს პრემიერ-მინისტრი სამეწარმეო გარემოს გაუმჯობესების საკითხზე თბილისში მიმდინარე საერთაშორისო კონფერენციას "მნიშვნელოვან მოვლენას" უწოდებს.
"საქართველოში და მთლიანად რეგიონში ეს არის პირველი ასეთი მაღალი დონის კონფერენცია. ეს მნიშვნელოვანი მოვლენაა", - განაცხადა გილაურმა კონფერენციაზე და აქვე მასში მონაწილეობისათვის საქართველოში რამდენიმე ქვეყნის ვიცე-პრემიერებისა და მინისტრების ჩამოსვლას მიესალმა.
ამასთან, გილაურმა მსოფლიო ბანკის იმ კვლევაზეც ისაუბრა, რომლის მიხედვითაც საქართველო ნომერ პირველ რეფორმატორ ქვეყნად დასახელდა და განმარტა, რომ 5 წლის წინ, ჩვენს ქვეყანას იგივე რეიტინგში 112-ე პოზიცია ეკავა.
"ახლა კი, ამ რეიტინგის მიხედვით, საკმაოდ წინ წავიწიეთ და მე-12 ადგილზე გადმოვინაცვლეთ", - განმარტა საქართველოს პრემიერმა.
თავად კონფერენციის ერთ-ერთი მონაწილის, საერთაშორისო საფინანსო კორპორაციის აღმოსავლეთ ევროპისა და ცენტრალური აზიის დეპარტამენტის დირექტორის, სნეჟანა სტოილჯკოვიჩის განცხადებით, საქართველოში ბოლო პერიოდში მნიშვნელოვანი რეფორმები გატარდა და ქვეყანაში ბიზნესის წარმოება მნიშვნელოვნად გამარტივდა.
"საქართველოში მნიშვნელოვნადაა გაუმჯობესებული ბიზნესის წარმოება. ქვეყანაში, ფაქტობრივად, ხდება მცირე და საშუალო ბიზნესის მხარდაჭერა. დღის განმავლობაში ჩვენ გვექნება საშუალება გამარტივებული პროცედურები საკუთარი თვალით ვნახოთ. ამავდროულად, ჩვენ საქართველოს მთავრობისგან იმის გაგებაც გვაინტერესებს, არსებობს თუ არა ამ რეფორმების უკეთ განხორციელების ხელისშემშლელი ფაქტორები. ქვეყანაში შემოსულმა ინვესტიციებმა უკვე 500 მილიონი დოლარი შეადგინა და ქვეყანაში ამ დროისათვის 35 მნიშვნელოვანი პროექტი ხორციელდება. ჩვენ საქართველოს მთავრობის პარტნიორები ვართ ტურიზმის განვითარებაში და ვიმედოვნებს, რომ შედეგს აუცილებლად მივაღწევთ," - განაცხადა სტოილჯკოვიჩმა.
აღსანიშნავია, რომ საქართველოში სტუმრად მყოფი სხვადასხვა ქვეყნის წარმომადგენლობითი დელეგაციები შსს-სა და ფინანსთა სამინისტროს მომსახურების ცენტრებს, საჯარო რეესტრსა და თბილისის მერიას ეწვევიან და გატარებულ რეფორმებს ადგილზე გაეცნობიან.
შეგახსენებთ, რომ სასტუმრო "რედისონ ბლუ ივერიაში" დღეს გაიხსნა ორ დღიანი კონფერენცია, რომლის ორგანიზატორებიც საერთაშორისო საფინანსო კორპორაცია, მსოფლიო ბანკი და საქართველოს მთავრობა არიან. კონფერენციაზე განიხილება საქართველოში და სხვა ქვეყნებში სამეწარმეო გარემოს გაუმჯობესების საკითხები და გატარებული რეფორმები.