ტელეარხ NBC-ის ინფორმაციით, ტეხასის ერთ-ერთ სკოლაზე განხორციელებულ შემზარავ თავდასხმას გადაურჩა გოგონა, რომელმაც სისხლი წაისვა და თავი მკვდრად მოაჩვენა.
გადარჩენილი გოგონა 11 წლის მია სერილიოა. მისი ოჯახის ინფორმაციით, გოგონას სხეულში ტყვიის ფრაგმენტები მოხვდა, თუმცა ახლა სახლშია და მის სიცოცხლეს საფრთხე არ ემუქრება.
მია სერილიოს მამა ამბობს, რომ გოგონა შეესწრო მასწავლებლის ევა მირელესის მკვლელობას, რის შემდეგაც მან მასწავლებლის ტელეფონი აიღო და 911-ში დარეკა.
ამის შემდეგ, მია თავის გარდაცვლილი თანაკლასელის სხეულზე დაწვა და სისხლი წაისვა, რათა მკვლელს ეფიქრა, რომ ისიც გარდაცვლილი იყო.
მოგვიანებით, მიამ თქვა, რომ გოგონა, რომელზეც ის იწვა, ჯერ კიდევ სუნთქავდა, მაგრამ დახმარების მოსვლამდე გარდაიცვალა.
შეგახსენებთ, 25 მაისს ტეხასის შტატის ერთ-ერთ სკოლაზე თავდასხმას 21 ადამიანი ემსხვერპლა, მათ შორის 19 ბავშვი და 2 ზრდასრული.
