"ელიტ ელექტრონიქსი" გაფართოვებას განაგრძობს. დღეს, 29 ნოემბერს, კომპანიის ქსელს ბათუმში, კასპსა და ზუგდიდში 3 ახალი მაღაზია შეემატება. 30 ნოემბერს კი ერთი ობიექტები ოზურგეთშიც გაიხსნება.
გახსნის დღეს "ელიტ ელექტრონიქსი" აღნიშნული რეგიონების მოსახლეობას მსოფლიოს წამყვანი ბრენდის BOSCH-ის ტექნიკაზე სპეციალურ აქციას შესთავაზებს.
"ფასდაკლების აქცია საგანგებოდ მაღაზიის გახსნას დავუკავშირეთ. მხოლოდ 29 ნოემბერს ახალი მაღაზიის მომხმარებლებს შესაძლებლობა ექნებათ "BOSCH-ის საოჯახო პროდუქცია 50%-მდე ფასდაკლებით შეიძინონ", - აცხადებს "ელიტ ელექტრონიქსის" დირექტორის პირველი მოადგილე დავით კენჭაძე.
მისი ინფორმაციით, წლის ბოლომდე დაგეგმილი იყო 5 მაღაზიის გახსნა, თუმცა კომპანიას ჯამში 7 ახალი მაღაზია დაემატება, მათ შორის 2 მათგანი უკვე გაიხსნა თბილისსა და თელავში, ხოლო ყველაზი დიდი და განსხვავებული ფორმატის მაღაზია თბილისი ცენტრალში დეკემბრის დასაწყისიდან იფუნქციონირებს.
"ჩვენი სურვილია, "ელიტ ელექტრონიქსი" კიდევ უფრო ფართო ქსელით იყოს წარმოდგენილი, რათა შევძლოთ მომხმარებელს პროდუქცია ლოკალურად, თავისივე ქალაქში მდებარე მაღაზიაში შევთავაზოთ", - აცხადებს დირექტორის პირველი მოადგილე.
წლის ბოლომდე "ელიტ ელექტრონიქსი" ჯამში 27 მაღაზიით იქნება წარმოდგენილი.
სს "ელიტ ელექტრონიქსი" საქართველოს სამომხმარებლო ბაზარზე 1996 წლიდან ფუნქციონირებს და სადღეოსოდ 22 მაღაზიას მოიცავს. კომპანიას გამოარჩევს, ფართო და მუდმივად განახლებადი ასორტიმენტი, საგარანტიო მომსახურება, შეძენილი ნივთის ადგილზე მიტანის, საქონლის განვადებით შეძენის სერვისი, მომსახურების მაღალი დონე, სისტემატურად ფასდაკლებებისა და სპეციალური საჩუქრების დაწესების ტრადიცია.
