რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის, ზურაბ აბაშიძის განცხადებით, სატელეფონო საუბარი შედგა რუსეთის ფედერაციის საბჭოს საერთაშორისო კომიტეტის თავმჯდომარესთან, გრიგორი კარასინთან.
ზურაბ აბაშიძის თქმით, კარასინმა უთხრა, რომ "რეფერენდუმთან" დაკავშირებით მოსკოვი არანაირ აქტივობაში არ არის ჩართული.
როგორც აბაშიძე ამბობს, თავის მხრივს, კარასინს გადასცა თბილისის ნეგატიური დამოკიდებულების შესახებ ე.წ. რეფერენდუმთან დაკავშირებით.
"შედგა სატელეფონო საუბარი გრიგორი კარასინთან. მან გააკეთა მოკლე კომენტარი ცხინვალის რეგიონში დაგეგმილ ე.წ. რეფერენდუმთან დაკავშირებით და აღნიშნა, რომ მოსკოვში საქმის კურსში არიან ჩვენი უარყოფითი დამოკიდებულების შესახებ, ეს მათი მხრიდან არ დარჩება უყურადღებოდ. მან ასევე თქვა, რომ რეფერენდუმთან დაკავშირებით მოსკოვი არანაირ აქტივობაში არ არის ჩართული. მოგეხსენებათ, ანალოგიური კომენტარი რამდენიმე დღის წინ კრემლის პრესსპიკერმა დიმიტრი პესკოვმაც გააკეთა", - განაცხადა აბაშიძემ.
ზურაბ აბაშიძის თქმით, კარასინთა საუბრისას, საავიაციო რეისების აღდგენის საკთხი არ წამოჭრილა.
სატელეფონო საუბრის შესახებ რუსულ მედიასთან მოკლე კომენტარი გააკეთა თავად გრიგორი კარასინმა. მისი თქმით, ინფორმირებულია იმის თაობაზე, რომ "ქართველ პარტნიორებს "რეფერენდუმის" საკითხი აღელვებთ, რასაც "მოსკოვი ყურადღებით აკვირდება".
ოკუპირებულ ცხინვალის რეგიონში რუსეთთან შეერთების საკითხზე ე.წ. რეფერენდუმი 17 ივლისს არის დაგეგმილი.