რუსეთის პრეზიდენტის ადმინისტრაცია, ახალგაზრდულ საქმეთა სააგენტო ("როსმოლოდეჟი") და განათლების სამინისტრო განიხილავენ ბავშვთა და ახალგაზრდების ახალი მოძრაობის შექმნას. იუწყება სააგენტო РБК.
გამოცემის წყაროების მტკიცებით, ახალი მოძრაობის დაფუძნების შესახებ კანონპროექტი სახელმწიფო დუმას 19 მაისს, საბჭოთა პიონერის დღეს წარედგინება.
საკითხში გარკვეული წყაროები ახალი მოძრაობის დაფუძნებას "ბავშვებსა და მოზარდებში პატრიოტიზმისა და სამშობლოს სიყვარულის" გაღვივების აუცილებლობით ხსნიან.
მათივე თქმით, ახალი მოძრაობა არ შეიძლება ჩაითვალოს პიონერული ორგანიზაციის ანალოგად, "თუნდაც იმიტომ, რომ მასში გაწევრიანება სავალდებულო არ იქნება".
ამასთან, იგეგმება ახალი მოძრაობის უჯრედების შექმნა სკოლებსა და სპეციალიზებულ საგანმანათლებლო დაწესებულებებში.
იუწყებიან, რომ 19 მაისს კანონპროექტის წარდგენისა და შემდგომში მისი დამტკიცებიდან მალევე, 1- ელ ივნისს (ბავშვთა დაცვის საერთაშორისო დღეს) იგეგმება ახალი ბავშვთა მოძრაობის კონგრესის ჩატარება.
ლენინის სახელობის საკავშირო პიონერული ორგანიზაცია - ბავშვთა მასობრივი ორგანიზაცია სსრკ-ში, ჩამოყალიბდა ახალგაზრდა ლენინელთა კომკავშირის II კონფერენციის გადაწყვეტილებით, რომელმაც 1922 წლის 19 მაისს მიიღო დადგენილება „ბავშვთა მოძრაობის“ შესახებ. ამ დროიდან 19 მაისი პიონერის დღედ გამოცხადდა. 1924 წლიდან, ლენინის გარდაცვალების შემდეგ, ორგანიზაციას მიენიჭა მისი სახელი. პიონერული ორგანიზაციის ხელმძღვანელობას კომკავშირის ცენტრალური კომიტეტი ახორციელებდა.
