"მინდა მადლობა გადავუხადო ჩვენს საერთაშორისო პარტნიორებს მათი მხრიდან მრავალი წლის განმავლობაში გარემოს დაცვის მიმართულებით გაწეული მხარდაჭერისთვის, რამაც, ასოცირების შეთანხმების ფარგლებში, გარემოს დაცვის მიმართულებით აღებული ბევრი მნიშვნელოვანი რეფორმის გატარების საშუალება მოგვცა. ერთ-ერთი მნიშვნელოვანი რეფორმა, რომელიც ჯანდაცვის სამინისტროსთან ერთად დავიწყეთ, არის გარემოსდაცვითი შეფასების კანონმდებლობის მიღება, რომელმაც საფუძველი ჩაუყარა ქვეყანაში სტრატეგიული გარემოსდაცვითი შეფასების მექანიზმის შექმნას. გარემოსა და ჯანდაცვის საკითხები მჭიდრო კავშირშია. ჯანსაღ გარემოში ცხოვრება უზრუნველყოფს ჩვენი მოქალაქეების ჯანმრთელობას “, - განაცხადა ნინო თანდილაშვილმა ღონისძიებაზე სიტყვით გამოსვლისას.
აღინიშნა, რომ ახალი პროექტი შესაბამის უწყებებს დაეხმარება კანონმდებლობით გათვალისწინებული ახალი სტანდარტების და რეგულაციების იმპლემენტაციაში, რაც უმთავრესია ევროპასთან ინტეგრაციის გზაზე.
პროექტის „ჯანმრთელობაზე ზემოქმედების შეფასების პრაქტიკის დანერგვის ხელშეწყობა საქართველოში“ ძირითადი მიზნებია დაეხმაროს საქართველოს შესაბამის უწყებებს ევროკავშირთან ჯანმრთელობაზე ზემოქმედების შეფასება განხორციელდეს ხუთი საკვანძო ელემენტის - ჯანმრთელობისა და თანასწორობის ხელშეწყობა, სექტორთა შორის თანამშრომლობის მხარდაჭერა, ყველა პარტნიორისთვის თანასარგებლის შექმნა, დაინტერესებულ მხარეთა ჩართულობის გაუმჯობესება, სტრატეგიული და პროცედურული ცვლილებების უზრუნველყოფა - რეალიზებით. ასევე, პროექტი ითვალისწინებს გარემოსა და ჯანმრთელობის საკითხებზე ცნობიერებისა და ცოდნის ამაღლების, საზოგადოების ჩართულობისა და კომუნიკაციის ხელშეწყობას. პროექტის ფარგლებში განხორციელდება საქართველოს კანონმდებლობის ჰარმონიზება ევროკავშირის სტანდარტებსა და სახელმძღვანელო პრინციპებთან, გარემოს ჯანმრთელობის მონიტორინგისა და მართვის საუკეთესო პრაქტიკის გათვალისწინებით.
პროექტს, რომლის ხანგრძლივობა 24 თვეს შეადგენს, აფინანსებს ევროკავშირი და ხორციელდება საფრანგეთის საჯარო სააგენტოს „საფრანგეთის ექსპერტიზა“ (Expertise France) და ფინეთის ჯანმრთელობისა და კეთილდღეობის ინსტიტუტის (THL) მხარდაჭერით.
ღონისძიებას ესწრებოდნენ საფრანგეთისა და ფინეთის რესპუბლიკების ელჩები საქართველოში, ევროკავშირის საელჩოს, საქართველოს პარლამენტის, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, გარემოს დაცვისა და სოფლის მეურნეობის სამინისტროს, საგარეო საქმეთა სამინისტროს, დაავადებათა კონტროლისა და საზოგადოებრივი ჯანმრთელობის ეროვნული ცენტრის, პროექტში მონაწილე საფრანგეთისა და ფინეთის პარტნიორი და არასამთავრობო ორგანიზაციების წარმომადგენლები და დარგის ექსპერტები.
