ბოლო 10 დღის განმავლობაში, მსოფლიო ბაზარზე ნავთობის ფასები არაერთგვაროვნად იცვლებოდა.
ნავთობპროდუქტების იმპორტიორთა კავშირის თავმჯდომარის ვანო მთვრალაშვილის განმარტებით, 15 ნოემბრიდან ნავთობის ფასმა შემცირება დაიწყო 88-87 დოლარიდან და 22-23 ნოემბერს ბარელზე 81-83 დოლარს შეადგენდა. თუმცა ბოლო 2-3 დღე ნავთობის ფასმა კვლავ მატება დაიწყო და დღეისათვის 84-86 დოლარს შეადგენს.
"ნავთობის ფასის კლება განპირობებული იყო ევრო ზონაში, კერძოდ ირლანდიაში არსებული ეკონომიკური კრიზისის ფაქტორით, რადგან გაჩნდა საშიშროება იმისა, რომ აღნიშნული კრიზისი გავრცელდება ესპანეთსა და პორტუგალიაში. რაც შეეხება ბოლო დღეებში ფასების მატებას, ის პირდაპირ უკავშირდება აშშ დოლარის კურსის ვარდნას ევროსთან მიმართებაში"- აცხდებს ნავთობპროდუქტების იმპორტიორთა კავშირის თავმჯდომარე ვანო მთვრალაშვილი.
მთვრალაშვილის განმარტებით, საქართველოში არსებულ ვითარებას, ფასები სტაბილურ ვითარებას ინარჩუნებს.
ნავთობპროდუქტების იმპორტიორთა კავშირის ინფორმაციით, დღეისათვის საქართველოში, საცალო ქსელში სუპერი ტიპის ბენზინის ფასი ლიტრზე - 2,00 - 2.05 ლარი. პრემიუმი ტიპის ბენზინი - 1,95 - 2 ლარი/ლიტრაზე; ევრო რეგულარი ტიპის ბენზინი - 1,85 - 1,90 ლარი/ლიტრაზე; რეგულარი ტიპის ბენზინი - 1,80 - 1,85 ლარი/ლიტრაზე; ევრო დიზელი - 1,95 - 2 ლარი/ლიტრაზე; დიზელი (ლ-62) - 1,80 - 1,85 ლარი/ლიტრაზე.