ფინანსთა მინისტრმა კახა ბაინდურაშვილმა და პარლამენტის საფინანსო-საბიუჯეტო კომიტეტის თავმჯდომარემ ზურაბ მელიქიშვილმა იმერეთის რეგიონში სამუშაო შეხვედრა გამართეს.
ქუთაისის აკაკი წერეთლის სახელობის სახელმწიფო უნივერსიტეტში გამართულ ინტერაქტიულ შეხვედრაზე არასამთავრობო სექტორის წევრებს, მაგისტრანტებს, ადგილობრივი თვითმმართველობების წარმომადგენლებს, მოსახლეობას მათ 2011 წლის სახელმწიფო ბიუჯეტის პროექტის პრიორიტეტები და რეგიონში დაგეგმილი ინფრასტრუქტურული, განათლების, ჯანდაცვისა და სოციალურ პროექტები გააცნეს.
„ბიუჯეტის დიდი ნაწილი სწორედ რეგიონებს ხმარდება. რა პროექტები ხორციელდება იმერეთში, როგორ უნდა გაუმჯობესდეს მომავალ წელს მოსახლეობის სოციალური მდგომარეობა. მოვისმინეთ რეგიონის მაცხოვრებელთა წინადადებები ამ მიმართულებით. ვფიქრობ, ძალიან საინტერესო ფორმატია - ასეთი დიალოგი მოსახლეობასთან ბიუჯეტის დამტკიცებამდე," - განაცხადა ფინანსთა მინისტრმა კახა ბაინდურაშვილმა.
ქუთაისში გამართულ შეხვედრას პრეზიდენტის რწმუნებული იმერეთის რეგიონში და ადგილობრივი ხელისუფლების წარმომადგენლებიც ესწრებოდნენ. ქუთაისამდე ასეთივე შეხვედრა ფინანსთა მინისტრმა თელავსა და ბათუმში გამართა.