რუსეთი არ არის მთვარეზე და იგი დანარჩენ მსოფლიოსგან სასიცოცხლო ძაფებით არის დაკავშირებული. ვალდებულების შეუსრულებლობის შემთხვევაში კი ეს ძაფები ნელ-ნელა გაწყვეტას დაიწყებს.
ამის შესახებ "ჯი-ეიჩ-ენს" უმრავლესობის წევრმა დავით დარჩიაშვილმა ფრანგული მხარის მიერ რუსეთის მიმართ გაკეთებული განცხადების შეფასებისას აღნიშნა.
"რუსეთი აქამდე არ იქცეოდა საერთაშორისო სამართლისა და პოლიტიკური მიზანშეწონილობის ადეკვატურად. სხვაგვარად საქმე ოკუპაციასთან და აგრესიასთან არ გვექნებოდა, თუმცა, ახლა რამდენად სწრაფად დაიწყებს ცივილურ მოქცევას და საერთაშორისო სამართლის პატივისცემას, წინასწარ ძნელი სათქმელია. უნდა გავითვალისწინოთ ისიც, რომ რუსეთი არ არის მთვარეზე და იგი დაკავშირებულია დანარჩენ სამყაროსთან სასიცოცხლო ძაფებით", - აღნიშნა დარჩიაშვილმა.
მისივე განცხადებით, თუ რუსეთი ცივილიზებულად არ მოიქცევა, ეს ძაფები ნელ-ნელა წყვეტას დაიწყებს და პრობლემებს Eშექმნის, როგორც კულტურულ-ეკონომიკურ, ასევე პოლიტიკური კუთხითაც.
დარჩიაშვილის შეფასებით, რუსეთი საქართველოსთან მოლაპარაკებაზე აუცილებლად წამოვა, თუმცა როდისთვის გახდება ეს შესაძლებელი, ჯერჯერობით ძნელი სათქმელია.
