უკრაინის ეროვნული უსაფრთხოებისა და თავდაცვის საბჭომ მიიღო გადაწყვეტილება უკრაინაში საგანგებო მდგომარეობის გამოცხადების შესახებ, გარდა დონეცკისა და ლუგანსკის რეგიონებისა. ამის შესახებ უკრაინის ეროვნული უსაფრთხოების საბჭოს მდივანმა, ალექსეი დანილოვმა განაცხადა.
დანილოვის განცხადებით, საბჭოს ეს გადაწყვეტილება უკრაინის უმაღლესმა რადამ უნდა დაამტკიცოს, რომელსაც საკითხი განსახილველად დღესვე გადაეგზავნება.
დანილოვმა განმარტა, რომ საგანგებო მდგომარეობასთან დაკავშირებული შეზღუდვები განსხვავდება რეგიონის მიხედვით.
დონეცკისა და ლუგანსკის ოლქებთან დაკავშირებით ეროვნული უსაფრთხოებისა და თავდაცვის საბჭოს მდივანმა განმარტა, რომ იქ საგანგებო სიტუაციის შემოღება შეუძლებელი იყო, მაგრამ უკვე მოქმედებს ცალკე სამართლებრივი რეჟიმი, რადგან საომარი მოქმედებები მიმდინარეობს.
მისივე თქმით, საგანგებო მდგომარეობის ამოქმედება, ამ დროისთვის, 30 დღით არის გათვალისწინებული.
"საგანგებო მდგომარეობა მოიცავს საზოგადოებრივი წესრიგისა და ობიექტების დაცვის გაძლიერება. ტრანსპორტის გადაადგილების შეზღუდვა, ტრანსპორტის დამატებითი ინსპექტირება, ფიზიკური პირების დოკუმენტების შემოწმება. ეს არის პრევენციული საკითხები, რათა ქვეყანაში მშვიდობა შევინარჩუნოთ, იმისთვის, რომ ჩვენმა ეკონომიკამ იმუშაოს და ჩვენმა ქვეყანამ იმუშაოს", - განაცხადა დანილოვმა.
