თურქეთის პრეზიდენტის რეჯებ ტაიპ ერდოღანის განცხადებით, რუსეთის მიერ დონბასის სეპარატისტული რეგიონების დამოუკიდებლობის ცნობა მიუღებელია.
ამასთან, ერდოღანმა ყველა მხარეს მოუწოდა, პატივი სცენ საერთაშორისო სამართალს.
"რუსეთის ამ გადაწყვეტილებას მიუღებლად მივიჩნევთ. მოვუწოდებთ ყველა მხარეს, გამოიჩინონ საღი აზრი და პატივი სცენ საერთაშორისო სამართალს“, - აღნიშნა თურქეთის პრეზიდენტმა.
ამავდროულად, სამშაბათს, თურქეთის პრეზიდენტმა სატელეფონო საუბარი გამართა უკრაინის პრეზიდენტ ვოლოდიმირ ზელენსკისთან.
ერდოღანმა ზელენსკის განუცხადა, რომ ანკარა ეწინააღმდეგება ყოველგვარ ნაბიჯს, რომელიც უკრაინის ტერიტორიულ მთლიანობას ემუქრება. თავის მხრივ, ზელენსკიმ მადლობა გადაუხადა ერდოღანს მხარდაჭერისთვის.
შეგახსენებთ, 21 თებერვალს რუსეთმა ცნო ე.წ. ლუგანსკისა და დონეცკის სახალხო რესპუბლიკების "სუვერენიტეტი". ამავდროულად, პუტინმა თავდაცვის სამინისტროს, სეპარატისტულ რეგიონებში "მშვიდობის უზრუნველსაყოფად" ჯარების გაგზავნა უბრძანა". დასავლეთმა მკაცრად დაგმო პუტინის გადაწყვეტილება.
