საფრანგეთის პრეზიდენტმა ემანუელ მაკრონმა სატელეფონო საუბარი გამართა აშშ-ისა და რუსეთის ლიდერებთან ჯო ბაიდენსა და ვლადიმირ პუტინთან.
ელისეის სასახლის ინფორმაციით, პრეზიდენტმა მაკრონმა პუტინსა და ბაიდენს სამიტის ჩატარება შესთავაზა.
როგორც იუწყებიან, პრეზიდენტ მაკრონის წინადადებით, სამიტი თავდაპირველად ბაიდენსა და პუტინს შორის უნდა გაიმართოს, რომელშიც მოგვიანებით ყველა დაინტერესებული მხარე შეძლებს მონაწილეობას.
სამიტზე უნდა იმსჯელონ ევროპის უსაფრთხოებისა და სტაბილურობის შესახებ, ასევე აღმოსავლეთ უკრაინაში ცეცხლის შეწყვეტის თაობაზე.
საფრანგეთის პრეზიდენტის ადმინისტრაცია იუწყება, რომ ბაიდენი და პუტინი დათანხმდნენ სამიტის ჩატარებაზე.
გავრცელებული ინფორმაციით, ბაიდენ-პუტინის სამიტი მხოლოდ იმ შემთხვევაში შეიძლება შედგეს, თუ მანამდე რუსეთი უკრაინაში არ შეიჭრება.
თეთრი სახლის პრესმდივნის, ჯენ ფსაკის თქმით, ვაშინგტონი დიპლომატიის ერთგულია და პრეზიდენტი ბაიდენი მზად არის პუტინთან შესახვედრად, "თუ მანამდე არ მოხდა შეჭრა".
მანამდე ცნობილი გახდა, რომ ევროპის ტერიტორიაზე, 24 თებერვალს შეხვედრას გამართავენ შეერთებული შტატების სახელმწიფო მდივანი ენტონი ბლინკენი და რუსეთის საგარეო საქმეთა მინისტრი სერგეი ლავროვი.
