გერმანული ავიაკომპანია Lufthansa-ს განცხადებით ორშაბათიდან კიევში ფრენებს შეაჩერებს.
გავრცელებული ინფორმაციით, ამ ეტაპზე მიღებული გადაწყვეტილებით, გერმანული ფლაგმანი ავიაკომპანია ფრენებს კიევში თებერვლის ბოლომდე არ განახორციელებს.
თავდაპირველად, დასავლურმა მედიამ გაავრცელა ინფორმაცია, რომ Lufthansa მთელი უკრაინის მასშტაბით აჩერებდა ფრენებს. მოგვიანებით, დაზუსტდა, რომ ფრენების შეჩერება ამ დროისთვის მხოლოდ კიევს ეხებოდა.
ავიაკომპანიის განცხადებას წინ უსწრებდა, გერმანიის ხელისუფლების მოწოდება მოქალაქეებისადმი, უკრაინის დაუყოვნებლივ დატოვების თაობაზე.
დასავლური მედია წერს, რომ ბერლინისა და ავიაკომპანიის განცხადებები შესაძლოა უკავშირდებოდეს დაზვერვის ახალ ცნობებს, რომ რუსეთი უკრაინაში უახლოეს ხანებში შეჭრას გეგმავს.
შეგახსენებთ, 18 თებერვალს, თეთრ სახლში გამართულ პრესკონფერენციაზე, პრეზიდენტმა ჯო ბაინდენმა განაცხადა, რომ დაზვერვის მონაცემების თანახმად, პუტინმა უკრაინაზე თავდასხმის გადაწყვეტილება მიიღო.
