"ის, რაც დონბასში ხდება, არის ამ რეგიონის მცხოვრებთა ნამდვილი გენოციდი", - ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ ტელეკომპანა NTV-ს ეთერში განაცხადა.
"ახლა დასავლელი პარტნიორები თავს უფლებას აძლევენ დაეჭვდნენ, ისევე როგორც ფსაკი [თეთრი სახლის პრესმდივანი], და, სამწუხაროდ, სხვა ბევრი, თუნდაც სახელმწიფოს მეთაური, რომ სიტუაცია არ არის ისეთი, რაზეც ჩვენ ვსაუბრობთ: რომ არ არსებობს მასობრივი საფლავები, ან ეს შეიძლება იყოს ყალბი, რომ იქ სიტუაცია არ ჰგავს გენოციდს. არა, ეს ნამდვილად არ ჰგავს გენოციდს, ეს არის გენოციდი. ბუნებრივია", - განაცხადა ზახაროვამ.
ზახაროვას განცხადებას წინ უსწრებდა, რუსული მედიის მიერ გავრცელებული ინფორმაცია, რომლის თანახმადა, სეპარატისტულ დონეცკის რეგიონში ე.წ. მთავრობის შენობასთან ააფეთქეს მილიციის უფროსის მანქანა.
ინციდენტთან დაკავშირებით, სეპარატისტული დონეცკის ლიდერმა დენის პუშლინმა რუსეთის მედიასთან საუბრისას განაცხადა, რომ იგი "აფეთქებას განიხილავს როგორც დივერსიის აქტს, რაც [უკრაინის მხრიდან] თავდასხმითი ოპერაციებისთვის მზადების ერთ-ერთი ნიშანია".
შეერთებული შტატებისა და უკრაინის ოფიციალური პირების განცხადებით, მანქანის აფეთქება იყო დადგმული თავდასხმა, რომელიც მიზნად ისახავს აღმოსავლეთ უკრაინაში დაძაბულობის კიდევ უფრო გაღვივებას.
ბოლო დღეების განმავლობაში, დასავლეთი აცხადებს, რომ რუსეთი გეგმავს "ცრუ დროშის ოპერაციას", ყალბ საბაბს, რათა გაამართლოს უკრაინაში შეჭრა. სახელმწიფო მდივან ენტონი ბლინკენის განცხადებით, ეს შეიძლება იყოს ყალბი, დადგმული ტერორისტული დაბომბვა რუსეთის შიგნით, მასობრივი სამარხების გამოგონილი აღმოჩენა, დრონებით დადგმული შეტევა მშვიდობიანი მოსახლეობაზე, "ყალბი ან თუნდაც რეალური" ქიმიური თავდასხმა, რასაც რუსეთი "ეთნიკურ წმენდად" ან "გენოციდად" შეაფასებს.
ბოლო დღეებია, უკრაინის ხელისუფლება რუსეთის მიერ მხარდაჭერილი სეპარატისტული რეგიონების მხრიდან ცეცხლის შეწყვეტის აქტიური დარღვევის შესახებ იტყობინება.
უკრაინის თავდაცვის მინისტრმა ოლექსი რეზნიკოვმა პარასკევს უმაღლესი რადას სხდომაზე განაცხადა, რომ გასული დღის განმავლობაში, სეპარატისტებმა ცეცხლის შეწყვეტის შეთანხმება 60-ჯერ დაარღვის, მისი თქმით, უკრაინელმა სამხედროებმა მინსკის შეთანხმებით აკრძალული იარაღის გამოყენების 43 შემთხვევა აღრიცხეს.
რეზნიკოვის განცხადებით, რუსეთს მიერ მხარდაჭერილმა სეპარატისტებმა ცეცხლი გახსნეს კიევის კონტროლს დაქვემდებარებულ ტერიტორიაზე არსებული 30 დასახლებული პუნქტის მისამართით. მისივე თქმით, შედეგად ერთი ჯარისკაცი დაიჭრა, დაშავდა ასევე ერთი ჯარისკაცი და ორი მშვიდობიანი მოქალაქე.
