შეერთებული შტატებისა და უკრაინის ოფიციალური პირების განცხადებით, რუსეთის მიერ მხარდაჭერილ სეპარატისტულ დონეცკის რეგიონში მანქანის აფეთქება იყო დადგმული თავდასხმა, რომელიც მიზნად ისახავს აღმოსავლეთ უკრაინაში დაძაბულობის კიდევ უფრო გაღვივებას.
ტელეარხ CNN-თან საუბრისას, უკრაინის შინაგან საქმეთა მინისტრის მრჩეველმა ანტონ გერაშჩენკომ განაცხადა, რომ ეს იყო პროვოკაცია.
"ჩვენი ინფორმაციით, ეს იყო დადგმული თავდასხმა და პროვოკაცია", - განუცხადა გერაშჩენკომ CNN-ს.
შეერთებული შტატების სახელმწიფო დეპარტამენტის წარმომადგენელმა კი მანქანის აფეთქებას "ცრუ დროშის" ოპერაცია უწოდა.
"მსგავსი ინცინდენტები, ისევე როგორც სეპარატისტული ლიდერების მოწოდებები მოსახლეობის ევაკუაციაზე ვითომდა უკრაინის მოსალოდნელი აგრესიის გამო, ახალი მცდელობაა, სიცრუისა და დეზინფორმაციის მეშვეობით შეინიღბოს ის ფაქტი, რომ რუსეთი ჭეშმარიტი აგრესორია აღნიშნულ კონფლიქტში", - თქვა დეპარტამენტის წარმომადგენელმა.
შეგახსენებთ, ცოტა ხნის წინ, რუსული მედიის ინფორმაციით, სეპარატისტული დონეცკის ე.წ. მთავრობის შენობასთან ააფეთქეს თვითგამოცხადებული რესპუბლიკის მილიციის უფროსის მანქანა.
ინციდენტთან დაკავშირებით, სეპარატისტული დონეცკის ლიდერმა დენის პუშლინმა რუსეთის მედიასთან საუბრისას განაცხადა, რომ იგი "აფეთქებას განიხილავს როგორც დივერსიის აქტს, რაც თავდასხმით ოპერაციებისთვის მზადების ერთ-ერთი ნიშანია".
მანამდე უკრაინის სეპარატისტული რეგიონების ე.წ. ლიდერებმა მოსახლეობის რუსეთში ევაკუაციის შესახებ გამოაცხადეს.
