"გამოსვლა შინაარსიანი იქნება და მას ტრაფარეტული დატვირთვა არ ექნება, როგორც ეს ზოგადად საერთშორისო ფორუმზე გამოსვლისას ხდება", - განუცხადა ტყეშელაშვილმა ჟურნალისტებს.

მისივე განმარტებით, ევროპარლამენტმა ტრიბუნა საქართველოს იმის გამო დაუთმო, რომ მას "ჩვენი ქვეყნის პრეზიდენტის მოსმენის დიდი სურვილი ჰქონდა".

"ეს იქნება მხოლოდ საქართველოსთვის დათმობილი გამოსვლა. პრეცენდენტი იმისა, რომ ერთ პრეზიდენტს ორჯერ მიემართა ევროპარლამენტისთვის, არ არსებობს. ეს იმიტომ, რომ დიდი იყო დაინტერესება საქართველოს პრეზიდენტის მოსმენის", - განმარტა მან.

რაც შეეხება სააკაშვილის გამოსვლის თემებს, ევროკავშირში საქართველოს ელჩის, სალომე სამადაშვილის განცხადებით, ქვეყნის პირველი პირი მხოლოდ შიდა საკითხებზე საუბრით არ შემოიფარგლება და ის რეგიონალური მნიშვნელობის თემებსაც შეეხება.

"გამოსვლს ერთ-ერთი ძირითადი თემა იქნება რეგიონის უსაფრთხოება და რეგიონში არსებული ვითარება, რაც ევროკავშირის და ევროპარლამენტის განსაკუთრებული ინტერესის სფერო და საგანია... მნიშვნელოვანია ის, რომ ჩვენ გვექნება საშუალება ევროპარლამენტს მივმართოთ სწორედ დღეს, როცა ევროპაში ევროკავშირსა და რუსეთის სამომავლო ურთიერთობების შესახებ სერიოზული დისკუსია მიმდინარეობს", - განუცხადა სამადაშვილმა ჟურნალისტებს.

შეგახსენებთ, რომ საქართველოს პრეზიდენტ მიხეილ სააკაშვილის ევროპარლამენტში გამოსვლა თბილისის დროით, დაახლოებით 15:00 საათისთვის არის დაგეგმილი.