გაერთიანებული სამეფოს პარლამენტის თემთა პალატა დაეთანხმა საგარეო საქმეთა ოფისის მიერ რუსეთის წინააღმდეგ მომზადებულ მკაცრი სანქციების პაკეტს.
ახალი კანონმდებლობა საშუალებას მისცემს ბრიტანეთის მთავრობას, რუსეთის უკრაინაში შეჭრის შემთხვევაში, მკაცრი სანქციები დააწესოს რუსეთის ფიზიკური პირებისა და კომპანიების ფართო სპექტრის მიმართ.
რუსეთის წინააღმდეგ სანქციების რეჟიმის ადრინდელი რედაქცია ბრიტანეთს მთავრობას საშუალებას აძლევდა შემზღუდავი ზომები დაეწესებინა მხოლოდ მათ წინააღმდეგ, ვინც უშუალოდ იყო ჩართული უკრაინის სტაბილურობისთვის ძირის გამოთხრის მცდელობებში.
ახალი კანონმდებლობით კი ბევრად გაფართოვდა იმ პირთა და კომპანიების განსაზღვრის კრიტერიუმები, რომელთაც შესაძლოა, სანქციები დაუწესდეთ, კრემლის უკრაინაში შეჭრის შემთხვევაში.
ახალი პაკეტის თანახმად, სანქცირებულთა შორის, შესაძლოა, მოხვდნენ რუსეთისთვის სტრატეგიული და ეკონომიკური მნიშვნელობის კომპანიები და მათი ხელმძღვანელი პირები.
სანქციების გათვალისწინებულია პირებისთვის, რომლებიც ჩართულები არიან უკრაინის დესტაბილიზაციაში ან მისი სუვერენიტეტის, ტერიტორიული მთლიანობისა და სტაბილურობისთვის ძირის გამოთხრის მცდელობებში.
კანონში განმარტებულია, რომ "ჩართული პირები" გულისხმობს მათ, რომლებიც შეჭრის შემთხვევაში, სარგებელს იღებენ რუსეთის მთავრობისგან ან მისი მხარდაჭერიდან.
"ჩართული პირების" ქვეშ მოიაზრება მათ შორის ის, ვინც უზრუნველყოფს ფინანსურ მომსახურებას, ტექნოლოგიებს, ფონდებსა და რესურსებს, რომლებსაც შეუძლიათ მონაწილეობა მიიღონ უკრაინის დესტაბილიზაციაში, ასევე ხელს უშლიან საერთაშორისო ორგანიზაციების მუშაობას, აკეთებენ ბიზნესს დონბასში და ეწევიან ვაჭრობას ან მუშაობენ ყირიმში.
სანქციების სამიზნე სტრატეგიული მნიშვნელობის სფეროებად შემოსაზღვრულია შემდეგი სექტორები - ქიმიური მრეწველობა, სამშენებლო, სამხედრო, ენერგეტიკა, ელექტრონიკა, ფინანსური მომსახურება, ტრანსპორტი, კომუნიკაციები, ციფრული ტექნოლოგიები.
უკვე კანონად ქცეული სანქციების პაკეტი რუსეთის უკრაინაში შეჭრის შემთხვევაში ავტომატურად არ ამოქმედდება, თუმცა საშუალებას მისცემს ბრიტანეთის მთავრობას, შექმნილი ვითარების გათვალისწინებით, განსაზღვროს სამიზნე პირთა და კომპანიათა წრე.
