რუსეთის ფედერაცია სეპარატისტულ აფხაზეთთან შეთანხმების გაფორმებას გეგმავს, რომლის მიხედვითაც, მოსკოვში აფხაზეთის სავაჭრო-საგამოფენო ცენტრი უნდა გაიხსნას და ამისათვის რუსეთის საყოველთაო საგამოფენო ცენტრში ტერიტორიაც გამოიყოს. აღნიშნული შეთანხმების პროექტი მთავრობის მიერ უკვე მოწონებულია.
მთავრობის განკარგულების თანახმად, რუსეთი აპირებს სეპარატისტულ აფხაზეთს 50-წლიანი იჯარით გადასცეს "მოსკოვში განლაგებული რუსეთის ფედერაციის ხალხების კულტურული მემკვიდრეობის ობიექტი", რომლის საერთო ფართი 933,6 კვ.მ-ია. საიჯარო თანხა სიმბოლური იქნება, 1 რუსული რუბლი წელიწადში. ამ ობიექტთან ერთად აფხაზეთს ასევე იჯარით გადაეცემა მიწის ნაკვეთი.
"დაევალოს რუსეთის ეკონომიკის განვითარების სამინისტროს გამართოს მოლაპარაკებები აფხაზურ მხარესთან და შეთანხმების მიღწევის შემთხვევაში რუსეთის ფედერაციის მთავრობის სახელით ხელი მოაწეროს შესაბამის ხელშეკრულებას", _ ნათქვამია რუსეთის მინისტრთა კაბინეტის დადგენილებაში.
შეთანხმების პროექტით გათვალისწინებულია, რომ შენობის კაპიტალურ სარემონტო და სარესტავრაციო სამუშაოებს აფხაზური მხარე თავისი საკუთარი ხარჯებით განახორციელებს.