რუსეთის ბალტიისა და ჩრდილოეთის ფლოტების 6 დიდი სადესანტო ხომალდი ხმელთაშუა ზღვიდან შავ ზღვაში გადადის. ამის შესახებ რუსეთის თავდაცვის სამინისტრო იტყობინება.
უწყების ინფორმაციით, ხომალდების შავ ზღვაში შესვლა დაგეგმილ წვრთნებს უკავშირდება.
"რუსეთის საზღვაო ძალების დიდი სადესანტო ხომალდების რაზმმა დაიწყო ბოსფორისა და დარდანელის სრუტეების გავლა. გემები ხმელთაშუა ზღვიდან შავ ზღვაში გეგმიურ გადასვლას ახორციელებენ, სადაც მონაწილეობას მიიღებენ საზღვაო წვრთნებში", - ნათქვამია განცხადებაში.
რაზმის შემადგენლობაში არიან სადესანტო ხომალდები - "Королев", "Минск", "Калининград", Петр Моргунов", "Георгий Победоносец", "Оленегорский горняк".
მანამდე, ხომალდები, რუსეთის თავდაცვის სამინისტროს განცხადებით, სირიის საპორტო ქალაქ ტარტუსში იმყოფებოდნენ, სადაც რუსეთის საზღვაო ძალების ბაზაა განთავსებული.
20 იანვარს, რუსეთმა განაცხადა, რომ მსოფლიოს სხვადასხვა რეგიონში მასშტაბურ სამხედრო-საზღვაო წვრთნებს ჩაატარებს.
თავდაცვის სამინისტროს განცხადებით, წვრთნებში მონაწილეობას მიიღებს 140 ათასზე მეტი სამხედრო ხომალდი და 60-ზე მეტი თვითმფრინავი. უწყების ცნობით, წვრთნები ჩატარდება, როგორც სანაპირო წყლებში, ისე შედარებით მოშორებულ "ოპერატიულად მნიშვნელოვან" რაიონებში, მათ შორის ხმელთაშუა ზღვაში, ჩრდილო-აღმოსავლეთ ატლანტისა და წყნარ ოკეანეში.
