ფინანსთა მინისტრი კახა ბაინდურაშვილი აჭარაში მოღვაწე ბიზნესმენებს, ინვესტორთა ასოციაციისა და სავაჭრო-სამრეწველო პალატის წევრებს შეხვდა. შეხვედრას რეგიონში მომუშავე თურქი ინვესტორებიც ესწრებოდნენ.
ფინანსთა მინისტრმა მათ ახალი საგადასახადო კოდექსით გათვალისწინებული სიახლეები გააცნო. საუბარი ასევე შეეხო სარფის საბაჟო-გამშვები პუნქტის სარეაბილიტაციო სამუშაოებს და იმ პროცედურებზე, რომელიც დაინერგება მას შემდეგ, რაც გამშვები პუნქტი საქართველოსა და თურქეთს ერთობლივად სამართავად გადაეცემა.
"ახალი საგადასახადო კოდექსის ამოქმედებამდე, გვინდა ეტაპობრივად, ყველა რეგიონში ბიზნესს დეტალურად გავაცნოთ დოკუმენტით გათვალისწინებული ნორმები. ამჟამად მიმდინარეობს სერიოზული მუშაობა ქვენორმატიულ აქტებზე და ამ მიმართულებით ბიზნესის მხრიდან წამოსული წინადადებები და კომენტარები მნიშვნელოვანია, რათა კანონმდებლობა იმ ფორმით დაიხვეწოს, რომ მან კერძო სექტორს მუშაობა გაუადვილოს", - განაცხადა ბაინდურაშვილმა. შეხვედრას ასევე ესწრებოდა აჭარის ფინანსთა და ეკონომიკის მინისტრი ვაჟა ბოლქვაძე.