ქართველებისათვის კარგად ნაცნობმა, აფხაზი და ოსი სეპარატისტების დიდმა მეგობარმა და გულშემატკივარმა კონსტანტინე ზატულინმა უახლოეს დღეებში შესაძლოა დუმის დსთ-ს ქვეყნებისა და თანამემამულეებთან ურთიერთობების კომიტეტის თავმჯდომარის მოადგილის თანამდებობა დატოვოს. ინფორმაციას ამის შესახებ რუსული მედია ავრცელებს და მიუთითებს - "ასეთია ზატულინსა და კომიტეტის ხელმძღვანელის ალექსეი ოსტროვსკის შორის არსებული დაპირისპირების შედეგები".
"РБК daily"-ის მონაცემებით, ზატულინის მოცილება ჯერ კიდევ რამდენიმე კვირის წინ გადაწყდა. დუმაში განმარტავენ, რომ ზატულინის მოქმედებები, ხშირად კი რეაქციული და მწვავე განცხადებები ხელს ძალიან უშლიდნენ იმ სამხედროებს რომლებიც უკრაინაში მუშაობდნენ. კერძოდ, შავი ზღვის ფლოტის კურატორებს, რომლებიც რეგიონში თავიანთ მშვიდ პოლიტიკას ატარებენ.
რუსული მედიის ინფორმაციით, ზატულინის გათავისუფლების მთავარი მოწინააღმდეგე დუმის სპიკერი ბორის გრიზლოვი იყო. ფრაქცია "ედიანაია როსიას" ხელმძღვანელს არ სურდა ერთ ერთი წამყვანი წევრის სკანდალური გათავისუფლება, ვინაიდან ყოველივე ეს სრულიად არასაჭირო ხმაურს გამოიწვევდა.
სწორედ ამის გამო, გრიზლოვის აპარატში დაიწყეს, შედარებით რბილი ვარიანტის დამუშავება, რომლის მიხედვითაც ზატულინის ოდნავ შეშინება იყო გეგმაში იმით, რომ მისი ხელმძღვანელობით მომუშავე დსთ-ს ქვეყნების ინსტიტუტს დროებით დაფინანსება შეუწყდებოდა.
"თუმცა, ზატულინმა ფაქტობრივად თავად შეუწყო ხელი თავის გათავისუფლებას", - წერს რუსული მედია, როდესაც მან ოფიციალური წერილი მისწერა კომიტეტის ხელმძღვანელს ოსტროვსკის და მისგან მისი მისამართით გამოთქმულ ფრაზებზე ახსნა-განმარტებები მოითხოვა.
"16 ნოემბერს ინტერნეტ-გვერდზე "ვესტი.აზ"-ზე გაჩნდა სტატია სახელწოდებით - "ზარი უკვე რეკავს სომხების ლობისტზე რუსულ პარლამენტში", _ წერს ზატულინი წერილში და დუმის დსთ-ს ქვეყნებისა და თანამემამულეებთან ურთიერთობების კომიტეტის თავმჯდომარის ალექსეი ოსტროვსკის სიტყვები მოჰყავს: - "გასვრაც კი არ მსურს ზატულინის გვარზე. არ მსურს მის დონეზე დავეშვა, რომელის როგორც ჩანს მშობლებმა ვერ აღზარდეს. მეცოდება იგი, იმიტომ, რომ ძალიან ძნელია მის ასაკში გაიგო, რომ არ სჭირდები არავის, მათაც კი ვინც შენთან ერთად საერთო პოლიტიკურ გაერთიანებაშია. არც ერთი თავმოყვარე ადამიანი არ მოახდენს იმ სისულელის კომენტირებას, რომელსაც პერიოდულად ისვრის ზარულინი. მისი სიტყვები ღვარძლითა და შურითაა სავსე", _ აცხადებდა ოსტროვსი.
ზატულინი ოსტროვსკისგან ამ სიტყვების გამო ახსნა-განმარტებებს მოითხოვს, წინააღმდეგ შემთხვევაში კი ზომების მიღებით იმუქრება.
თავის მხრივ, ოსტროვსკიმ დაადასტურა, რომ ზატულინის წერილი მიიღო და აღნიშნა, რომ მასთან ერთად მუშაობის სამი წლის განმავლობაში ზატულინი მას ხშირად აყენებდა შეურაცხყოფას.
ზატულინის გათავისუფლების მიზეზად გამხდარი კიდევ ერთი ვარაუდი არის ის, რომ იგი მოსკოვის ყოფილი მერის იური ლუჟკოვის გუნდის წევრია.
როგორც ცნობილია, დუმის დსთ-ს ქვეყნებისა და თანამემამულეებთან ურთიერთობების კომიტეტის თავმჯდომარის მოადგილე 2006 დან 2010 წლამდე უკრაინაში არასასურველ პერსონად იყო გამოცხადებული. ახლადარჩეულმა იანუკოვიჩმა მას ნება დართო უკრაინაში ჩასვლისა და მცირე ხნის შემდეგ მან იანუკოვიჩის "რეგიონების პარტიის" კრიტიკა დაიწყო. ასე რომ არ არის გამორიცხული, რომ ზატულინს უახლოეს მომავალში უკრაინაში ჩასვლა კვლავ აუკრძალონ.
ზატულინი ასევე პერსონა ნონ გრატადაა გამოცხადებული აზერბაიჯანში თავისი აშკარად გამოკვეთილი პროსომხური პოზიციის გამო. იგი რეგულარულად ჩადის სეპარატისტულ მთიან ყარაბაღში და რამდენიმე ხნის წინ სომხეთის წინაშე დიდი დამსახურებისათვის ერევანში "ღირსების ორდენიც" მიიღო.
