"ერთიანი სატრანსპორტო ადმინისტრაცია" იშლება, _ ამის შესახებ დღეს ეკონომიკისა და მდგრადი განვითარების მინისტრმა ვერა ქობალიამ განაცხადა.
მისი განმარტებით, "ერთიანი სატრანსპორტო ადმინისტრაცია" დაიშლება სახმელეთო, საჰაერო და საზღვაო დეპარტამენტებად, რომელიც ეკონომიკისა და მდგრადი განვითარების სამინისტროს დაექვემდებარება.
"ამ სამსახურის დაშლის აუცილებლობა გამოიწვია იმან, რომ უნდა გადავიდეთ საერთაშორისო სტანდარტებზე. აუცილებელია, სამსახურში ავიყვანოთ ახალი კადრები, რომელთაც აქვთ ევროკავშირთან ურთიერთობის გამოცდილება. მე ვთხოვ ყველა დაინტერესებულ ადამიანს, რომელსაც შესაბამისი გამოცდილება აქვს, სამინისტროში დაგვიკავშირდნენ", - განაცხადა ვერა ქობალიამ.
შეგახსენებ, რომ ერთიან სატრანსპორტო ადმინისტრაციაში საჰაერო, სახმელეთო და საზღვაო ადმინისტრაციების გაერთიანება 2005 წელს მოხდა. მაშინ მთავრობის არგუმენტი იყო ის, რომ გაერთიანებული უწყება უფრო კარგად მოახდენდა ცალკეულ სფეროებზე ოპერირებას. დღეს კი მთავრობა აცხადებს, რომ დაშლილ უწყებებში უფრო კარგად მოხდება ამა თუ იმ სფეროს მართვა და დარგის გაუმჯობესება.
ერთიანი სატრანსპორტო ადმინისტრაცია თავდაპირველად ეკონომიკური განვითარების სამინისტროს ექვემდებარებოდა, შემდეგ ის რეგიონალური განვითარებისა და ინფრასტრუქტურის სამინისტროში გადავიდა. მას შემდეგ, რაც ეკონომიკის სამინისტრომ რეფორმა განიცადა და ეკონომიკისა და მდგრადი განვითარების სამინისტროდ გადაკეთდა, ერთიანი სატრანპორტო ადმინისტრაცია კვლავ ეკონომიკის სამინისტროს დაექვემდებარა.
