ამერიკის შეერთებული შტატების პრეზიდენტის, ბარაკ ობამას განცხადებით, აშშ-ის ადმინისტრაცია არა მხოლოდ საქართველოს მხარდამჭერ განცხადებებს აკეთებს, არამედ ამ მიმართულებით მუშაობს.
ამის შესახებ ჟურნალისტებს ობამასთან გამართული პირველი ოფიციალური პირისპირ შეხვედრის დასრულების შემდეგ საქართველოს პრეზიდენტმა მიხეილ სააკაშვილმა განუცხადა.
"კმაყოფილი ვარ შეხვედრით. შეხვედრის დროს აშშ-ის პრეზიდენტმა მაღალი შეფასება მისცა ჩვენს მიერ განხორციელებულ როგორც ეკონომიურ, ისე დემოკრატიულ რეფორმებს. კარგი ცოდნა გამოიჩინა სიტუაციის დეტალების და როგორც აღნიშნა, უჭერს საქართველოს ტერიტორიულ მთლიანობას და არა მხოლოდ მხარდამჭერ განცხადებებს აკეთებენ, არამედ ამ მიმართულებით მუშაობენ", - აცხადებს მიხეილ სააკაშვილი.
მისივე თქმით, ობამამ აშშ-ის ადმინისტრაციის მხარდაჭერა საქართველოს ნატოში ინტეგრაციის კუთხითაც დააფიქსირა.
გარდა ამისა, პრეზიდენტმა ობამამ დადებითად შეაფასა საქართველოს წვლილი ნატო-ს აისეფის მისიაში ავღანეთში, სადაც თითქმის ათასი ქართველი სამხედრო მსახურობს და გულწრფელი მადლიერება გამოხატა იმ მსხვერპლისთვის, რომელიც ქართველმა ხალხმა გაიღო.
შეგახსენებთ, რომ საქართველოსა და ამერიკის შეერთებული შტატების პრეზიდენტების პირველი ოფიციალური შეხვედრა წუხელ, ლისაბონში მიმდინარე ნატოს სამიტის ფარგლებში შედგა.
