რუსეთის ეგიდით მოქმედი, კოლექტიური უსაფრთხოების ხელშეკრულების ორგანიზაციამ ყაზახეთიდან თავისი ძალების გაყვანის პროცესი დაიწყო. ამის შესახებ რუსეთის თავდაცვის სამინისტროს მიერ გავრცელებულ ინფორმაციაშია ნათქვამი.
უწყების განცხადებით, ორგანიზაციის ძალებმა ასევე დაიწყეს მათ მიერ დაცული სახელმწიფოებრივი მნიშვნელობის ობიექტების ადგილობრიეი სამართალდამცავი ორგანოებისთვის გადაცემა.
რუსეთის თავდაცვის სამინისტრო იუწყება, რომ სამხედროები აღჭურვილობას რუსულ თვითმფრინავებში ტვირთავენ და მუდმივი დისლოკაციის ადგილზე დასაბრუნებლად მიეშურებიან.
მანამდე, ყაზახეთის პრეზიდენტმა, ყასიმ ჟომართ-თოყაევმა, პარლამენტში გამოსვლისას, განაცხადა, რომ კოლექტიური უსაფრთხოების ხელშეკრულების ორგანიზაცია ასრულებს თავის მისიას. თოყაევმა პირობა დადო, რომ ყაზახეთიდან კონტიგენტის ეტაპობრივი გაყვანა 13 იანვარს დაიწყება და 10 დღეში დასრულდება.
ყაზახეთში გათხევადებული აირის ფასის გაძვირების გამო საპროტესტო აქციები 2 იანვარს დაიწყო. პროტესტის ეპიცენტრი ქვეყნის უდიდეს ქალაქი ალმათი იყო. საპროტესტო აქციების დასრულების მიზნით, თოყაევმა გადააყენა მთავრობა ასკარ მამინის მეთაურობით და უშიშროების საბჭოს თავად ჩაუდგა სათავეში, რომელსაც უწინ ნურსულთან ნაზარბაევი ხელმძღვანელობდა.
ქვეყნის მასშტაბით საგანგებო მდგომარეობა გამოცხადდა. თოყაევმა კოლექტიური უსაფრთხოების ხელშეკრულების ორგანიზაციას დახმარების თხოვნით მიმართა, საპასუხოდ, ქვეყანაში სამხედრო კონტინგენტი გაიგზავნა.
მისიის ფარგლებში, ყაზახეთში რუსეთიდან, ბელარუსიდან, ყირგიზეთიდან და სომხეთიდან 2 ათასზე მეტი სამხედრო და 250 ერთეული ტექნიკა ჩავიდა.
