"ეროვნული ფორუმის" ერთ-ერთმა ლიდერმა გუბაზ სანიკიძემ ვერის პარკის საკალათბურთო დარბაზში შეკრებილ ადამიანებს "დიდი ქართული შეთქმულების" მოწყობისაკენ მოუწოდა. მისი თქმით, "ეროვნული ფორუმი" წარმომადგენლობითი სახალხო კრების საინიციატივო ჯგუფთან კონსულტაციებს დაიწყებს, 25 ნოემბერს დაგეგმილ ეროვნულ კრებასთან დაკავშირებით.
სანიკიძის თქმით, ოპოზიციურ სპექტრში განხეთქილება უნდა დასრულდეს და თითოეულმა პარტიამ საკუთარი ამბიციები უკან უნდა გადადოს, როცა საქმე სამშობლოს გადარჩენის საკითხს ეხება.
"ხელისუფლებას ყველაფერი აწყობილი ჰქონდა იმაზე, რომ მათი აზრით, ოპოზიცია ვერ მოილაპარაკებდა, ერთმანეთს დაჭამდა. "ეროვნული ფორუმი" 25 ნოემბერს იქნება იქ, სადაც უნდა იყოს და სადაც ყველა ელოდება, რომ იყოს", - განაცხადა სანიკიძემ და დარბაზში შეკრებილ ადამიანებს "დიდი ქართული შეთქმულების" მოწყობისაკენ მოუწოდა.
დღეს ვერის ბაღის საკალათბურთო დარბაზში საზოგადოებრივი მოძრაობების, არასამთავრობო ორგანიზაციებისა და ოპოზიციური პარტიების შეხვედრა გაიმართა, რომლის ორგაიზატორიც "თანხმობის დარბაზი" იყო. დღევანდელ შეხვედრაზე ცნობილი გახდა, რომ "ეროვნული ფორუმი" ეროვნულ სახალხო კრებაში, რომელიც 25 ნოემბერს, პარლამენტის წინ გაიმართება, მონაწილეობას მიიღებს.
