22 ნოემბერს 14:00 საათზე, ქუთაისში, სასტუმრო კომპლექს ბაგრატში საქართველოში მოღვაწე ბიზნესმენებისა და ინვესტორებისთვის ბიზნესფორუმი გაიმართება.
ღონისძიება ტარდება ქუთაისის მერიის ინიციატივით და მიზნად ისახავს ქალაქის ეკონომიკური განვითარების ძირითადი მიმართულებების გაცნობას, ქალაქში არსებულ საპრივატიზაციო ობიექტების წარდგენასა და მათი გამოყენების შესაძლო პერსპექტივების განხილვას. ბიზნესფორუმი ტარდება საქართველოს პრემიერ-მინისტრისა და ეკონომიკისა და მდგრადი განვითარების მინისტრის მხარდაჭერით.
2012 წელს ქალაქი ქუთაისი შეიძენს საპარლამენტო ქალაქის ფუნქციას, რითაც გამყარდება ქუთაისის, როგორც საქართველოს მეორე დედაქალაქის სტატუსი. თავისუფალი ინდუსტრიული ზონის არსებობა და სხვადასხვა სამთავრობო სტრუქტურის ქუთაისში გადმოტანა თავის მხრივ ხელს შეუწყობს ქალაქის საინვესტიციო გარემოს გაუმჯობესებას.
ამ ეტაპზე ინვესტორთათვის აქტუალური ხდება ქუთაისის ახალი საინვესტიცო გარემოს, პოტენციალისა და შესაძლებლობების გაცნობა. დღესდღეობით ქალაქში არის მოწესრიგებული ინფრასტრუქტურა, დაბალი საბაზრო ფასები მიწასა და აქტივებზე, სტაბილური კრიმინოგენური ვითარება, ხელსაყრელი გეოეკონომიკური მდებარეობა, ბუნებრივი რესურსების მრავალფეროვნება ქალაქის სიახლოვეს და მის შემოგარენში, კვალიფიციური და იაფი მუშახელი, სამრეწველო წარმოების დიდი გამოცდილება, ტურიზმის განვითარების ფართო პერსპექტივები და სხვა.
