ფოთის თავისუფალი ინდუსტრიული ზონის ორგანიზატორმა და ადმინისტრატორმა "რაკია საქართველო თიზ"-მა საქართველოს ფინანსთა სამინისტროს შემოსავლების სამსახურს ახლად აშენებული, თანამედროვე ტექნიკით აღჭურვილი საბაჟო კომპლექსი გადასცა, რითაც ფოთის თიზ-ის ოპერირება დაიწყო.
კომპლექსის მშენებლობა-განვითარებაში RAKIA-მ 6 მლნ დოლარზე მეტის ინვესტირება განახორციელა, რათა მომხდარიყო მისი აღჭურვა ისეთი თანამედროვე ტექნიკით, როგორიც არის მაგალითად: Rapiscan Systems Eagle M4509 (მობილური რენტგენული სკანირების სისტემა), Rapiscan System 622XR (რენტგენი) და Forklift Doosan D185-5 და სხვ. საბაჟო ასევე აღჭურვილია უახლესი კომპიუტერული ტექნიკითა და ვიდეო მონიტორინგის სისტემებით.
ამიერიდან თიზ-ში დარეგისტრირებულ კომპანიას შეუძლია მიიღოს თავისუფალი ზონის კომპანიის ყველა პრივილეგია. საბაჟო კომპლექსი დაექვემდებარება საბაჟო დეპარტამენტს და იმუშავებს 24X7X365.
ფოთის თიზ-მა დაიმსახურა დიდი დაინტერესება და გამოხმაურება სხვადასხვა ქვეყნიდან და ამჟამად უკვე 26-მა კომპანიამ აიღო ლიცენზია და გადაწყვიტა განავითაროს თავისი საქმიანობა ფოთის თიზ-ში. ინვესტორი კომპანიები წარმოდგენილნი არიან ისეთი ქვეყნებიდან როგორებიცაა: აზერბაიჯანი, სომხეთი, თურქეთი, არაბეთის გაერთიანებული ემირატები, უკრაინა, ირანი, ჩეხეთის რესპუბლიკა და სხვა. რამდენიმე ექსპორტზე ორიენტირებულმა ქართულმა კომპანიამაც აიღო ლიცენზია რათა დაიწყონ საქმიანობა თიზ-ში. ინვესტორები წარმოდგენილნი არიან სხვადასხვა ინდუსტრიიდან, როგორებიცაა - საღებავების, საკვები ზეთების, ავეჯისა თუ ფეროშენადნობების წარმოება და სხვა. ზოგიერთმა კომპანიამ უკვე საკუთარი ქარხნების მშენებლობაც დაიწყო თიზ-ის ტერიტორიაზე.
დღეისათვის დარეგისტრირებული წარმატებული კომპანიებია მაგალითად:Aray Tomorrow (LG პროდუქტები, საქართველო), Tbilcement (აშშ), Woodimpex da Prime Industries (საქართველო), Metalurgical Manufacturing (უკრაინა), Bio Oil Industries (ჩეხეთის რესპუბლიკა) და სხვა. RAKIA საქართველო აწარმოებს მოლაპარაკებებს ისეთ კომპანიებთან, როგორებიცაა Zamil Steel (საუდის არაბეთი),Azersun Holding (აზერბაიჯანი), Multi Group (სომხეთი), Ghani Glass (პაკისტანი), Nagarguna Fertilizer (ინდოეთი), Mercury Holding (ირანი) და Purdue (აშშ) რათა მოხდეს მათი შემოყვანა ფოთის თავისუფალ ინდუსტრიულ ზონაში.
განვითარების პირველი ფაზის დასასრულში მყოფი ფოთის თიზ-ი, უკვე თავაზობს მომხმარებელს მსოფლიო დონის ინფრასტრუქტურის ქსელს. თანამედროვე საბაჟო კომპლექსის გარდა თავისუფალი ინდუსტრიული ზონა აღჭურვილია მაღალ ხარისხოვანი ვიდეო მონიტორინგის სისტემით, რომელსაც მართავს შ.ს.ს.-ს დაცვის პოლიციის დეპარტამენტი. ძირითადი ენერგომატარებლები, როგორებიცაა წყალი და ელექტროენერგია, უკვე ხელმისაწვდომია თიზ-ში. გაზი მიყვანილ იქნება ა.წ. დეკემბერში. ძირითადი საგზაო სისტემა, ასევე საკანალიზაციო და სანიაღვრე სისტემები აქტიური მშენებლობის პროცესშია. სარკინიგზო ხაზი უკვე მიყვანილია თიზ-ს საზღვრებამდე, ხოლო უშუალოდ ტერიტორიაზე შეყვანილ იქნება უახლოეს მომავალში. იმპორტ/ექსპორტზე ორიენტირებულ კომპანიათათვის სასაწყობე მეურნეობის მშენებლობა მიმდინარეობს.
პროექტის განვითარების მეორე სტადიაში კომპანია "რაკია საქართველო თიზ" გეგმავს ოფშორულ ფინანსური ცენტრის მოწყობას, რომელიც შესთავაზებს მომხმარებელს მსოფლიოს სხვადასხვა ქვეყნიდან ოფშორულ საფინანსო მომსახურებებს.
