2011 წელს ყველა სამინისტროს ხარჯი 10 პროცენტით შემცირდება. ამის შესახებ პრემიერ-მინისტრის პრესსამსახურის უფროსმა ნიკო მჭედლიშვილმა დღეს გამართულ პრესკონფერენციაზე განაცხადა.
მისი განმარტებით, სამინისტროს ხარჯების შემცირება ბიუჯეტის დეფიციტის შემცირებას ემსახურება.
"ბიუჯეტის დეფიციტი მომავალ წელს 6,3 პროცენტიდან დაახლოებით 4,3 პროცენტამდე შემცირდება. აღნიშნულს კი, პირველ ყოვლისა, "ბიუროკრატიული მადის ალაგმვით" უნდა მივაღწიოთ. ამისთვის მთავრობამ გადაწყვიტა 2011 წელს ყველა სამინისტროს ხარჯი 10 პროცენტით შეამციროს. ამასთან გამოაცხადოს სრული მორატორიუმი ავტომობილების შესყიდვაზე და არ გაზარდოს თანამდებობის პირთა ხელფასები", - განაცხადა მჭედლიშვილმა, რომლის განმარტებითაც, ხელფასების ზრდასთან დაკავშირებით შეზღუდვა სახელმწიფო უწყებების რიგითი თანამდებობის პირებს არ შეეხებათ.
მჭედლიშვილმა 2010 წლის სახელმწიფო ბიუჯეტში შესატან ცვლილებებზედაც ისაუბრა და განმარტა, რომ პრემიერ-მინისტრი საქართველოს პარლამენტის მიერ შესაბამისი პროექტის დამტკიცებას მიესალმება.
"მნიშვნელოვანია, რომ 2010 წლის ეკონომიკის ზრდის პროგნოზი გაიზარდა ადრე ნავარაუდევი 4,5 პროცენტიდან 5,5 პროცენტამდე. გარდა ამისა, მოხერხდა სახელმწიფო ბიუჯეტში 500 კილოვოლტიანი ხაზის მშენებლობისთვის თანხების მობილიზება და 12 მილიონი ლარის გამონახვა რამდენიმე საავადმყოფოს რეაბილიტაციისთვის", - განმარტა მჭედლიშვილმა, რომლის თქმითაც, საავადმყოფოების რეაბილიტაციის შედეგად ექსპლუატაციაში 1000 ახალი საწოლი შევა.
შეგახსენებთ, რომ 20109 წლის სახელმწიფო ბიუჯეტში შესატანი ცვლილებების პაკეტი პარლამენტმა დღეს პირველი მოსმენით დაამტკიცა.
