საზოგადოებრივი მოძრაობა ,,სოლიდარობა უკანონო პატიმრებს" შეშფოთებას გამოთქვამს აფხაზეთიდან დევნილი ნანა ფიფიას გარდაცვალების გამო.
ფიფიამ 27 ოქტომბერს საქართველოს ლტოლვილთა და განსახლების სამინისტროსთან თავი დაიწვა და 22 დღიანი მკურნალობის მიუხედავად დამწვრობის ცენტრში გუშინ გარდაიცვალა.
როგორც "ჯი-ეიჩ-ენს" ,,სოლიდარობა უკანონო პატიმრებს" პრესსამსახურში განუცხადეს, ნანა ფიფია ოკუპირებული ტერიტორიებიდან იძულებით გადაადგილებულ სხვა პირებთან ერთად ერთი თვის მანძილზე უშედეგოდ ითხოვდა საცხოვრებელი ფართით დაკმაყოფილებას, უწევდა უამრავი შეურაწყოფის ატანა სამინისტროს მარალჩინოსნების მხრიდან და სამინისტროს გულგრილი დამოკიდებულების გამო იძულებული გახდა მიემართა პროტესტის უკიდურესი ფორმისათვის, რაც სავალალო შედეგით დასრულდა.
"ს/მ ,,სოლიდარობა უკანონო პატიმრებს" ღრმა მწუხარებას გამოთქვამს ნანა ფიფიას გარდაცვალების გამო. აღნიშნულ ფაქტზე მთელ პასუხისმგებლობას ლტოლვილთა და განსახლების სამინისტროს ანიჭებს და კატეგორიულად მოითხოვს დადგეს მინისტრის კობა სუბელიანის სისხლის სამართლის პასუხისმგებლობის საკითხი ნანა ფიფიას თვითმკველობამდე მიყვანის გამო. ასევე მივმართავთ საერთაშორისო ორგანიზაციებს უყურადრებოდ არ დატოვონ აღნიშნული ფაქტი და მოახდინონ შესაბამისი რეაგირება, განსაკუთრებულ კონტროლზე იქნას აყვანილი საქართველოში იძულებით გადაადგილებულ პირთა უფლებები, რადგან სწორედ ამ უფლებების შელახისა და დარღვევის ფაქტებმა ბოლო თვეების განმავლობაში მასიური ხასიათი მიიღო და უკიდურეს მდგომარეობამდე მისული ნანა ფიფიას შემთხვვაში მსხვერპლითაც დამთავრდა",-ნათქვამია მოძრაობის მიერ გავრცელებულ განცხადებაში.
