22 ნოემბერს საქართველოს სტატისტიკის ეროვნულ სამსახურში ევროკავშირის პროგრამა TAIEX (ტექნიკური დახმარება და ინფორმაციის გაცვლა) მხარდაჭერით ექსპერტები ჩამოდიან.
უცხოელი ექსპერტები ქართველ სტატისტიკოსებს კონსულტაციებს გაუწევენ ისეთი მნიშვნელოვანი კვლევების ხარისხისა და მეთოდოლოგიის გაუმჯობესებაში, როგორიცაა ეროვნული ანგარიშები, მათ შორის მთლიანი შიდა პროდუქტი (მშპ). სამუშაო შეხვედრები საქსტატში უცხოელ კონსულტანტებთან ერთი კვირის განმავლობაში გაგრძელდება. შეხვედრებზე განიხილება ეროვნული ანგარიშების ყველა მნიშვნელოვანი მიმართულება.
ამავე დღეს, 22 ნოემბერს, გაეროს განვითარების პროგრამის დაფინანსებით საქართველოს სტატისტიკის ეროვნულ სამსახურს საერთაშორისო კონსულტანტი ეწვევა, რომელიც საქსტატის თანამშრომლებთან ერთად სოციალური სტატისტიკის მიმართულებით იმუშავებს. კერძოდ, განიხილავენ შინამეურნეობებისა და შრომის სტატისტიკის კვლევების სრულყოფისა და მეთოდოლოგიის გაუმჯობესების გზებსა და მიმართულებებს.
გარდა ამისა, საქსტატში უკვე ერთი კვირაა გრძელდება შვედი სტატისტიკოსების ვიზიტი. 7 კაციანი დელეგაციის ძირითადი მიზანია საქსტატსა და შვედეთის სტატისტიკას შორის გრძელვადიანი თანამშრომლობის პროექტის დაწყება.
შვედეთის სტატისტიკის სამუშაო ვიზიტი და შემდგომი თანამშრომლობის პროექტი ფინანსურად მხარდაჭერილია შვედეთის საერთაშორისო განვითარების სააგენტოს მიერ.
