ბიზნეს-სექტორი ჯანდაცვის სფეროთი დაინტერესდა. ამის შესახებ საქართველოს ბიზნესმენთა ასოციაციის წარმომადგენლებისა და საქართველოს შრომის, ჯანმრთელობისა და სოციალური დაცვის მინისტრ ანდრია ურუშაძის "შერატონ მეტეხი პალასში" გამართულ შეხვედრაზე გახდა ცნობილი.
როგორც ურუშაძემ განაცხადა, დიდი შანსია ჯანდაცვის სექტორში ბიზნესმენებმა დიდი ინვესტიციები ჩადო.
"მუდმივად, როგორც ქართველი, ასევე საერთაშორისო ბიზნესმენებისგან გვესმის დაინტერესება ჯანდაცვის სექტორის მიმართ. ჯანდაცვა ის სფეროა, რომელშიც უცხოეთში დიდი ინვესტიციები იდება. დღეს დიდი შანსია იმისა, რომ ბიზნესმენებმა ქართულ ჯადაცვის სისტემაში ინვესტიციების ჩადება დაიწყონ. ჯანდაცვის სფეროში მნიშვნელოვანი რეფორმები ტარდება, თუნდაც ჰოსპიტალური სექტორის პრივატიზაცია. ვფიქრობთ, რომ ბიზნესსექტორსა და ჩვენ სამინისტროს შორის სერიოზული თანამშრომლობა დაიწყება და ინვესტიციები განხორციელდება", - განაცხადა ანდრია ურუშაძემ.
საქართველოს ბიზნეს ასოციაციის პრეზიდენტ გიორგი ჭირაქაძის განცხადებით, ბიზნეს-სექტორი მზადაა ჯანდაცვის სფეროში ინვესტიციების განსახორციელებლად.
"დაინტერესებულები ვართ ჰოსპიტარული სექტორის პრივატიზაციით. ამ სექტორში შეიძლება ინვესტიციების ჩადება. მთელ მსოფლიოში ამ ბიზნესში დიდი ინვესტიცია ხდება და იგივე უნდა მოხდეს საქართველოშიც. იმედი მაქვს რომ ჩვენი თანამშრომლობა მაქსიმალურად სარგებლიანი და ღია იქნება", - აღნიშნა ჭირაქაძემ.