მაღალსიჩქარიანი ინტერნეტი უფრო ხელმისაწვდომი გახდება.
როგორც "ჯი-ეიჩ-ენს" ეკონომიკის სამინისტროდან აცნობეს, იწყება საკანონმდებლო ბაზის მომზადება იმისათვის, რომ ინრფასტრუქტურული პროექტების განხორციელების პარალელურად, გათვალისწინებული იყოს მოცულობა ოპტიკურ-ბოჭკოვანი კაბელის ჩასადებად.
"ოპტიკურ-ბოჭკოვანი მაგისტრალების მოცულობის შექმნის პრაქტიკა საკმაოდ ბევრ ქვეყანაში გამოიყენება და ეს შესაძლებელს ხდის შედარებით მცირე დანახარჯებით, მიმდინარე მშენებლობის პროცესში შეიქმნას გარემო მაღალსიჩქარიანი ინტერნეტის განვითარებისათვის როგორც ქალაქებში, ასევე რეგიონებში", - აცხადებენ სამინისტროში.
ამ საკითხებზე სპეციალური ჯგუფიც იმუშავებს, რომელიც სახელმწიფო უწყებების, ოპერატორული კომპანიების და საერთაშორისო საექსპერტო ორგანიზაციების წარმომადგენლებით დაკომპლექტდება.
აღსანიშნავია, რომ სწორედ საქართველოში საინფორმაციო საზოგადოების ჩამოყალიბებისა და უნივერსალური ინტერნეტ მომსახურების დანერგვის საკითხებს დაეთმო სემინარი, რომელიც სამინისტროს ორგანიზებით და ევროპის რეკონსტრუქციის და განვითარების ბანკის მონაწილეობით სასტუმრო "ძველ თბილისში" გაიმართა.
სემინარს, რომლის თემა იყო "როგორ შევქმნათ საუკეთესო გარემო საქართველოში ელექტრონული საზოგადოების ჩამოყალიბებისათვის" ეკონომიკისა და მდგრადი განვითარების მინისტრის პირველი მოადგილე არჩილ კეკელია უძღვებოდა.
