კრემლი განიხილავს უკრაინის წინააღმდეგ შეტევითი ოპერაციის განხორციელებას 2022 წლის დასაწყისში 175 000-მდე ჯარისკაცის მონაწილეობით, ერთდროულად რამდენიმე მიმართულებით. იტყობინება გამოცემა Washington Post-ი ამერიკული დაზვერვის მონაცემებზე დაყრდნობით.

გამოცემა აღნიშნავს, რომ ახლა რუსეთი, უკრაინის ირგვლივ ძალებისა და რეზერვისტების მოულოდნელ მობილიზებასთან ერთად, ითხოვს ვაშინგტონის გარანტიებს, რომ უკრაინა არ გახდება ნატოს წევრი და ალიანსი თავს შეიკავებს ყოველგვარი სამხედრო მოქმედებებისგან.

"რუსეთი გეგმავს უკრაინის წინააღმდეგ სამხედრო შეტევას 2022 წლის დასაწყიში, სამხედრო აგრესიაში ჩართული იქნება უკრაინის საზღვრებთან მობილიზებული 90 ათასამდე სამხედრო, რომლის რაოდენობის გაორმაგებას აპირებს", - ციტირებს Washington Post-ი ამერიკის ადმინისტრაციის მაღალი თანამდებობის პირის სიტყვებს, რომელიც საუბარს ანონიმურობის პირობის დაცვით დათანხმდა.

"გეგმა ითვალისწინებს 100 ბატალიონ-ტაქტიკური ჯგუფის ფართომასშტაბიან შეჭრას 175 000-მდე ჯარისკაცის მონაწილეობით, ჯავშანტექნიკით, არტილერიით და სხვა იარაღით", - განაცხადა წყარომ.

დაზვერვის დოკუმენტი, რომელიც ხელში ჩაუვარდა Washington Post-ს, ასევე მოიცავს სატელიტის მიერ გადაღებულ ფოტოებზე, სადაც ნაჩვენებია რუსული ჯარის თავმოყრა 4 სხვადასხვა ადგილას. ამ ლოკაციებზე განლაგებული 50 ბატალიონ-ტაქტიკური ჯგუფი, რომელთაც, გავრცელებული ინფორმაციით, გადაეცათ ახალი შეიარაღება.

უკრაინის დაზვერვის ინფორმაციით, ამ დროისთვის, რუსი სამხედროების რაოდენობა დაახლოებით 94 000-ს შეადგენს. ამერიკული დაზვერვის ცნობით, ეს რიცხვი 70 000-ია, მაგრამ კრემლი მათი რაოდენობის 175 000-მდე გეგმავს. 

უკრაინა-რუსეთს შორის დაძაბულობა იქნება პუტინისა და ბაიდენის შეხვედრის ერთ-ერთი მთავარი საკითხი, რომელიც სავარაუდოდ მომდევნო კვირას გაიმართება.

3 დეკემბერს ჯო ბაიდენმა განაცხადა, რომ მისი ადმინისტრაცია ყოვლისმომცველი ინიციატივებზე მუშაობს, რათა თავიდან იქნას აცილებული უკრაინაში რუსეთის სრულმასშტაბიანი შეჭრა.

ბაიდენმა არ დააკონკრეტა კონკრეტულად რა ზომებზეა საუბარი რუსეთის უკრაინაზე თავდასხმის თავიდან ასაცილებლად და მხოლოდ ის თქვა, რომ მისი ადმინისტრაცია მუდმივ კონტაქტშია კიევთან და ევროპელ მოკავშირეებთან არსებული ვითარების შესახებ. 

ამ კვირაში შეერთებულმა შტატებმა გააფრთხილა მოსკოვი, რომ რუსეთის წინააღმდეგ მკაცრი ეკონომიკური სანქციები დაწესდება, თუ უკრაინაში შეჭრას გადაწყვეტს.

უკრაინის საზღვრის სიახლოვეს რუსეთის სამხდრო შენართების მასშტაბური კონცენტრაცია კიევისა და დასავლეთის შეშფოთებას იწვევს. 3 დეკემბერს უკრაინის თავდაცვის მინისტრმა ალექსეი რეზნიკოვმა დაზვერვაზე დაყრდნობით განაცხადა, რომ რუსეთმა 94000-ზე მეტ ჯარისკაცს მოუყარა თავი უკრაინის საზღვართან და შესაძლოა იანვრის ბოლოს უკრაინაში შეიჭრას.