ქობულეთში, ე.წ. "ფიჭვნარის" ტერიტორიაზე არქეოლოგებმა კოლხთა საფლავები აღმოაჩინეს. "ტვ-25"-ის ინფორმაციით, არქეოლოგებმა ადგილზე ის ნივთებიც იპოვეს, რომელსაც წინაპრები გარდაცვლილ ადამიანებს საფლავში აყოლებდნენ.
"ტვ-25"-ის ინფორმაციით, მკვლევარები ამბობენ, რომ ათი დღის განმავლობაში ისინი უფრო დიდ აღმოჩენებს ელოდებიან. ეს ადგილი, ანუ ქობულეთის ფიჭვნარი თავისუფალ ტურისტულ ზონად მიხეილ სააკაშვილმა სექტემბერში გამოაცხადა. ეკონომიკის სამინისტრომ ქობულეთის ე.წ. თავისუფალ ტურისტულ ზონაში ინვესტორებისგან წინადადებების მიღება მანამ დაიწყო, სანამ ამ საკითხზე პარლამენტი იმსჯელებდა ან არქეოლოგებისა და სპეციალისტების დასკვნა მომზადდებოდა. მკვლევარები თვლიან, რომ ადგილი, რომელსაც მთავრობა სასტუმროების ასაშენებლად ამზადებს, ძეგლის სტატუსის მატარებელია და მას სპეციალისტების შესწავლა სჭირდება.
"აჭარაში მომუშავე მკვლევართა ჯგუფმა დახმარებისთვის სახელმწიფოს სხვადასხვა უწყებას მიმართა. კულტურული მემკვიდრეობის დაცვის ეროვნულმა სააგენტომ კი არქეოლოგებს ძეგლის შესასწავლად 70 ათასი ლარი გამოუყო. ფიჭვნარის ნაქალაქარის ფართობი ასი ჰექტარია, აქ არის ანტიკური ხანის ბერძნებისა და კოლხების სამარხები, რომელიც მე-3,მე-4 საუკუნით თარიღდება, ფიჭვნარშია ნაპოვნი ანტიკური და კლასიკური ხანის მონეტები, ოქროსა და ვერცხლის ნივთები. ახლა ამ ადგილას მიწას სასტუმროებისთვის ამზადებენ, ამიტომ სპეციალისტებს მუშაობა დაჩქარებული ტემპით უწევთ. ფიჭვნარში ანტიკური ხანის ნაქალაქართან სპეციალისტების დასკვნის გარეშე მიმდინარე სასტუმროების მშენებლობას ბრიტანელი პროფესორი, შავი ზღვისპირეთის ისტორიის მკვლევარი დევიდ ბრაუნდი არასწორად აფასებს: ფიჭვნარის ნაქალაქარს ძეგლის სტატუსი 1976 წლიდან აქვს. 2007 წელს შეიცვალა კანონი, რომლის თანახმადაც საქართველოს კულტურისა და ძეგლთა დაცვის სამინისტრომ ფიჭვნარის ნაკრძალის ინვენტარიზაცია მოითხოვა. საჭირო დოკუმენტები არქეოლოგებმა გაგზავნეს, თუმცა ტერიტორიას სტატუსი დღემდე არ მიუღია. კულტურისა და ძეგლთა დაცვის სამინისტროს ოფიციალური ინფორმაციით ეს საკითხი ჯერ შემუშავების პროცესშია"- ამ ინფორმაციას "ტვ-25" ავრცელებს.