2011 წლის ბიუჯეტის დამტკიცებამდე ფინანსთა მინისტრმა სპეციალური შეხვედრები დაიწყო რეგიონებში. 16 ნოემბერს კახა ბაინდურაშვილი პრეზიდენტის რწმუნებულთან გიორგი ღვინიაშვილთან ერთად რაიონების გამგებლებს შეხვდა. შეხვედრაზე განიხილეს 2011 წლის ბიუჯეტის ხარჯვითი ნაწილის პრიორიტეტები, ასევე თითოელ რაიონში მიმდინარე და მომავალი წლისთვის დაგეგმილი მნიშვნელოვანი სოციალური და ინფრასტრუქტურული პროექტები. როგორც სამუშაო შეხვედრის დაწყებამდე ფინანსთა მინისტრმა განაცხადა, ფინანსთა სამინისტროს ამოცანაა, რეგიონის პრიორიტეტები მაქსიმალურად აისახოს 2011 წლის სახელმწიფო ბიუჯეტში.
„გვაინტერესებს რა საჭიროება გააჩნია რეგიონს, რომელი პროექტების დაფინანსებაა მათთვის მნიშვნელოვანი. ჩვენ გავაცანით რა მიმართულებებით ხდება დაფინანსების გაზრდა ცენტრალურ ბიუჯეტში. ამ კუთხით არის ორი ძირითადი სექტორი - ინფრასტრუქტურა და სოფლის მეურნეობა, რაც კახეთისთვის განსაკუთრებით მნიშვნელოვანია. რეგიონალური ინფრასტრუქტურის რეაბილიტაცისთვის მომავალი წლის ბიუჯეტი თანხების დამატებას ითვალისწინებს, მათ შორისაა, როგორიც ნაპირსამაგრი სამუშაოები, ისე წყლის რეაბილიტაცია, რაც კახეთის რეგიონის აწუხებს. ეს პრობლემები გადასაჭრელია და ჩვენ მომავალ წელს შევეცდებით, ბევრი მათგანი მოგვარდეს. მნიშვნელოვანი გარღვევაა ბიუჯეტში სოფლის მეურნეობის სამინისტროსთვის დაფინანსების თითქმის გაოთხმაგება. კახეთის რეგიონი ერთ-ერთი მთავარი რეგიონია, რომელიც ისარგებლებს ამ დაფინანსებით. ვისაუბრეთ იმაზე, როგორ ესახება ადგილობრივ ხელისუფლებას ამ თანხების ეფექტურად გამოყენება. საუბარია როგორც სათესლე მასალის შეძენაზე ასევე სპეც. ტექნიკის დამატებითი ერთეულების შემოყვანაზე, რათა მოსავლის აღება და მიწის დამუშვება კიდევ უფრო გადაადვილდეს. განვიხილეთ სხვა პრიორიტეტები - განათლება, ჯანდაცვა. გვინდა რეგიონში კოორდინირებულად წარიმართოს როგორც ადგილობრივი ხელისუფლების, ისე სამინისტროების საქმიანობა, რათა კახეთის რაიონების მაცხოვრებელთა სურვილები სწორედ აისახოს რეგიონში დაგეგმილ პროგრამებში," - განაცხადა ფინანსთა მინისტრმა კახა ბაინდურაშვილმა ადგილობრივ და ცენტრალურ მედიასთან საუბრისას. ასეთი სამუშაო შეხვედრები მიმდინარე კვირას ქვემო-ქართლსა და სამცხე-ჯავახეთში გაიმართება