ქართველ მეზღვაურებმა, შესაძლოა, მუშაობა ვერ შეძლონ იმ გემებზე, რომლებიც ევროკავშირის ქვეყნებში შევლენ. შესაძლო შეფერხების შესახებ საქართველოს სატრანსპორტო ადმინისტრაციაში გაფრთხილება უკვე მიიღეს.
ამის შესახებ საქართველოს ეკონომიკისა და მდგრადი განვითარების მინისტრმა დღეს ბათუმის საზღვაო აკადემიაში სტუმრობისას განაცხადა.
ვერა ქობალიას თქმით, საქართველოს სატრანსპორტო ადმინისტრაცია ამ მხრივ მუშაობას იწყებს და ყველ შესაძლო გართულება თავიდან იქნება აცილებული.
ევროპის საზღვაო ორგანიზაცია "EMSA"-მ საქართველოს სატრანსპორტო ადმინისტრაციაში კვლევა 2006-2007 წლებში ჩაატარა. დარღვევების შესახებ კი გაფრთხილება საქართველოს სატრანსპორტო ადმინისტრაციამ მიმდინარე წელს მიიღო.
საერთაშორისო საზღვაო ორგანიზაცია დეკემბერი საქართველოს ექსპერტთა ჯგუფს მოავლენს, რომლებიც სიტუაციას ადგილზე შეისწავლიან და შეიმუშავებენ რეკომენდაციებს.
საზღვაო აკადემიაში სტუმრობისას ვერა ქობალია სწავლების პროცესითა და აკადემიის ინვენტარითაც დაინტერესდა.
მასალის გამოყენების პირობები