მაღალი მოდის სახლმა Dior-მა ჩინეთს ბოდიში მოუხადა შანხაიში, Dior-ის გამოფენაზე წარმოდგენილი ერთ-ერთი ფოტოსურათის გამო, რომელმაც ჩინეთის მოსახლეობაში აღშფოთება გამოიწვია. მოდის სახლის განაცხადებით, ის პატივისცემით ეპყრობა ჩინელი ხალხის გრძნობებს.
შანხაიში ცოტა ხნის წინ გაიხსნა Dior-ის გამოფენა სახელწოდებით Lady Dior, რომლის ფარგლებშიც მოეწყო ფოტოექსპოზიცია. ერთ-ერთმა ფოტოსურათმა, რომელზეც აღბეჭდილია - აზიელი გოგონა ჩანთით, ჩინელების აღშფოთება გამოიწვია. მათი აზრით, ფოტოსურათმა ჩინელი ქალი "ცუდი კუთხით" წარმოაჩინა.
მოდის სახლის განცხადებაში ნათქვამია, რომ როგორც კი ფოტოსურათის მიმართ ქსელში გაჩნდა კრიტიკა საზოგადოების მხრიდან, Dior-მა "მაშინვე მიანიჭა მას დიდი მნიშვნელობა" და მყისიერად წაშალა ფოტოსურათი Dior-ის ოფიციალური ვებგვერდიდან, ნამუშევარი ასევე მოიხსნა გამოფენიდანაც.
"Dior-ი, როგორც ყოველთვის პატივისცემით ეპყრობა ჩინელი ხალხის გრძნობებს, მკაცრად იცავს ჩინეთის კანონმდებლობას და თანამშრომლობს შესაბამის დეპარტამენტებთან საჯაროდ გამოფენილი ნამუშევრების შემოწმების მიზნით. იმ შემთხვევაში, თუ ადგილი ჰქონდა რაიმე ხარვეზს, როგორც ყოველთვის, მზად ვართ მოვისმინოთ კრიტიკა და დროულად გამოვასწოროთ შეცდომა, Dior-ის გულწრფელი დამოკიდებულება ჩინეთის საზოგადოებისა და მომხმარებლების მიმართ ურყევია", - ნათქვამია ინფორმაციაში.
გასულ კვირას ჩინურმა გამოცემა Beijing Daily-მა გამოაქვეყნა სტატია სათაურით "ასე გამოიყურებიან ჩინელი ქალები? დასავლურმა ძვირადღირებულმა ბრენდებმა ისევ თავის ძველ ჩვეულებას მიმართეს..." "ფოტოსურათზე გამოსახულია მოდელი მოჭუტული თვალებით, შავი ჩრდილებით, მოღუშული ჭორფლიანი სახით, ცხიმიანი თმებით და ამასთან კიდევ აცვია ცინის დინასტიის დროინდელი სამოსი", - წერს გამოცემა.
გაზეთი China Women's News-ი კი წერს რომ ეს არის "ჩინური კულტურის დამცირების მცდელობა".
ჩინეთი ხშირად მტკივნეულად რეაგირებს მსგავს სიტუაციებზე. 2018 წლის ნოემბერში უდიდესი სკანდალი აგორდა Dolce&Gabbana-ს ირგლივ, როდესაც ბრენდის ოფიციალურ ვებგვერდზე გამოქვეყნდა ვიდეორგოლი, სადაც ჩინელი მოდელი ჩხირებით მიირთმევს იტალიურ კერძებს - პიცას და სპაგეტის, კადრს მიღმა კი მამაკაცის ხმა ისმის, რომელიც მას რჩევებს აძლევს, როგორ გაართვას თავი რთულ ამოცანას. მოდის სახლი ჩინეთის საზოგადოების მხრიდან კრიტიკის ქარცეცხლში მოექცა. ცნობილი ბრენდი სექსიზმსა და რასიზმში დაადანაშაულეს. Dolce&Gabbana-ს შანხაიში დაგეგმილი შოუს გაუქმება მოუწია, რადგან ბევრმა მოდელმა და ვარსკვლავმა შოუში მონაწილეობაზე უარი თქვა.