პოლონეთ-ბელარუსის საზღვარზე შექმნილი მიგრაციული კრიზისის უკან ალიაქსანდრ ლუკაშენკა დგას, - ამის შესახებ პოლონეთის პრემიერ-მინისტრმა მათეუშ მორავეცკიმ სეიმის რიგგარეშე სხდომაზე განაცხადა.
"ყველამ ვიცით, რომ ამ ერთმა ადამიანმა ალიაქსანდრ ლუკაშენკამ სპეციალურად ჩამოიყვანა ათი ათასობით ადამიანი ბელარუსში, სწორედ ლუკაშენკას გადაყავს საზღვრისკენ სპეციალურად ადამიანთა ჯგუფები, მიგრანტები, ზოგჯერ ძალითაც კი. ჩვენ გვაქვს ასეთი ინფორმაცია, ჩვენს აღმოსავლეთ საზღვარზე... სწორედ ალიაქსანდრ ლუკაშენკას ეკისრება პასუხისმგებლობა იმაზე, რომ ეს ადამიანები უნდა დაბრუნდნენ თავიანთ ქვეყნებში, იქ, სადაც მათი ადგილია", - განაცხადა პრემიერმა.
გუშინ, 8 ნოემბერს ბელარუსის სასაზღვრო კომიტეტმა განაცხადა, რომ აღმოსავლეთის ქვეყნებიდან და აფრიკიდან ლტოლვილების ჯგუფები ბელარუსისა და პოლონეთის საზღვრისკენ გაემართნენ. უწყებაში ამბობდნენ, რომ პოლონეთის საზღვარზე ვითარება უკიდურესად დაძაბული იყო. პოლონეთის მიერ აღმართული მავთულხლართების წინ 2 ათასზე მეტი ადამიანი იყო შეკრებილი, მათ შორის ქალები და ბავშვები. პოლონელი მესაზღვრეები მათ არ უშვებდნენ, მიგრანტები კი პოლონეთის ტერიტორიაზე ძალით შეღწევას ცდილობდნენ.
ბოლო რამდენიმე კვირაა, ლიეტუვა, ლატვია და პოლონეთი ბელარუსის საზღვარზე მიგრანტების რაოდენობის ზრდის შესახებ საუბრობენ და მიგრაციული კრიზისის შექმნაში ბელარუსს ადანაშაულებენ. შექმნილი სიტუაციის გამო პოლონეთის პრეზიდენტმა ბელარუსთან საზღვარზე საგანგებო მდგომარეობა გამოაცხადა. საზღვრის დასაცავად, ადგილზე იმყოფებიან სამხედრო დანაყოფებები, პოლიცია და სპეცრაზმის ჯგუფები.
ლუკაშენკამ განახადა, რომ მინსკი აღარ აპირებს შეაჩეროს არალეგალი მიგრანტები, რომლებიც ევროკავშირის ქვეყნებში მოხვედრას ცდილობენ. ლუკაშენკას თქმით, დასავლეთის სანქციების გამო ამისთვის აღარ დარჩა აღარც ფული და აღარც ძალა.
