ამერიკულ სატელევიზიო ქსელ HBO-ს მინისერიალ "ლონდონგრად"-ში ФСБ-ს ყოფილი აგენტის, ალექსანდრ ლიტვინენკოს როლს სახელგანთქმული ბრიტანელი მსახიობი ბენედიქტ კამბერბეჩი ითამაშებს.
გამოცემა Variety-ის ცნობით, სერიალი დაფუძნებული იქნება ბრიტანელი ჟურნალისტის ალან კოუელის წინგზე The Terminal Spy (უკანასკნელი ჯაშუში), რომელიც 2006 წელს ლონდონში ლიტვინენკოს მოწამვლას ეხება.
მინისერიალის სცენარზე დევიდ სკარპა იმუშავებს, ხოლო რეჟისორი იქნება ოსკაროსანი ბრაიან ვოგელი, რომელმაც გადაიღო ფილმი Icarus - დოპინგის სკანდალის შესახებ რუსულ სპორტში. კამბერბეჩი ასევე იქნება პროექტის აღმასრულებელი პროდიუსერი.
ბენედიქტ კამბერბეჩმა სახელი გაითქვა BBC-ის სერიალ "შერლოკ"-ში შესრულებული შერლოკ ჰომლსის როლით. ის ასევე ცნობილია "იმიტაციის თამაშსა" და "დოქტორ სტრეინჯში" შესრულებული როლებით. მსახიობი არის BAFTA და Emmy ჯილდოს მფლობელი.
ალექსანდრ ლიტვინენკო, რომელმაც 1998 წელს საჯაროდ განაცხადა, რომ ბიზნესმენ ბორის ბერეზოვსკის მოკვლა დაავალეს, 2000 წელს ბრიტანეთში გაიქცა, სადაც მან პოლიტიკური თავშესაფარი და მოქალაქეობა მიიღო. 2006 წელს ის რადიოაქტიური ნივთიერება პოლონიუმ -210-ით მოწამვლის შედეგად გარდაიცვალა.
ლონდონის განცხადებით, ეს იყო რადიოაქტიური ნივთიერება პოლონიუმ -210-ით ადამიანის მოწამვლის პირველი შემთხვევა.
ბრიტანეთის ხელისუფლებამ მომხდარში რუსეთი დაადანაშაულა. გამოძიების ავტორი რობერტ ოუენი ამბობს, რომ დამნაშავეებს შესაძლოა მხარს უჭერდა პირადად ვლადიმირ პუტინი.
2021 წლის 21 სექტემბერს ადამიანის უფლებათა ევროპულმა სასამართლომ ალექსანდრ ლიტვინენკოს მკვლელობაზე პასუხისმგებლობა რუსეთს დააკისრა.
