ბათუმისა და ქობულეთის თავისუფალი ტურისტული ზონის დამაკავშირებელი გზის მშენებლობა 10 დღეში დაიწყება. ამის შესახებ საქართველოს პრეზიდენტმა დღეს აღნიშნულ ზონაში ყოფნისას განაცხადა, სადაც 12 სასტუმროს მშენებლობას ჩაეყარა საფუძველი.
"ჩვენ ვასრულებთ იმ ვალდებულებასაც, რომელიც ამ ადგილის ბათუმის ცენტრთან დაკავშირებას გულისხმობს. ამ გზის მშენებლობა ათ დღეში დაიწყება და მისი ექსპლუატაციაში შესვლის შემდეგ, ქობულეთის ტურისტული ზონიდან ბათუმში ჩასვლა მაქსიმუმ 15-20 წუთში იქნება შესაძლებელი - გააჩნია მოძრაობის სიჩქარეს", - განმარტა მიხეილ სააკაშვილმა.
აღნიშნულ კონტექსტში, ქვეყნის პირველმა პირმა განმარტა, რომ "ქობულეთი, რეალურად, ბათუმის ნაწილი ხდება".
"გვერდზე არის აღმოსავლეთ ევროპაში ყველაზე დიდი გასართობი ცენტრი "ციცინათელა". აქვე შენდება 10 ათას კაციანი დახურული და ღია საკონცერტო დარბაზი, რომელიც ძალიან დიდი კულტურული მნიშვნელობის მქონე ცენტრი იქნება და კიდევ გვაქვს უნიკალური ფიჭვნარი თავისი უნიკალური პლაჟით და საინტერესო ტურისტული პოტენციალით. ეს ნიშნავს, რომ ეს ადგილი, რომელიც ყველაზე განუვითარებელი იყო, ერთ-ერთ ულამაზეს უბნად ყალიბდება", - განმარტა ქვეყნის პირველმა პირმა.
შეგახსენებთ, რომ საქართველოს პრეზიდენტმა დღეს აჭარაში ქობულეთის ტურისტული ზონის მშენებლობას ჩაუყარა საფუძველი.