საფრანგეთის კათოლიკურ ეკლესიაში 1950 წლიდან მსახურობდა ათასობით პედოფილი მღვდელი, განაცხადა ეკლესიაში სექსუალური ძალადობის შემთხვევების გამოძიების დამოუკიდებელი კომისიის ხელმძღვანელმა ჟან-მარკ სოვემ.
მისი თქმით, კომისიამ გაარკვია, რომ საფრანგეთის 115 ათასი ყოფილი და ახლანდელი კათოლიკური სასულოერო პირი - 2900-3200 ადამიანი კავშირშია სხვადასხვა სახის სექსუალურ ძალადობასთან.
კომისიის მიერ შეგროვებული მტკიცებულებები ეფუძნება ეკლესიის, სასამართლოსა და პოლიციის არქივებს, ასევე მსხვერპლთა აღიარებებს.
სექსუალური დანაშაულების დამოუკიდებელი გამოძიება ინიცირებული იყო 2018 წელს საფრანგეთის კათოლიკური ეკლესიის მიერ სხვა ქვეყნებში ეკლესიებში გახმაურებული სკანდალების ფონზე. მაშინ გამომჟღავნდა ათასობით შემთხვევა კათოლიკური ეკლესიის სასულიერო პირების მიერ ბავშვების მიმართ სექსუალური დანაშაულის შესახებ მთელ მსოფლიოში - აშშ-დან ავსტრალიამდე.
სოვემ გაზეთ Le Monde-ს განუცხადა, რომ მისმა კომისიამ პროკურატურას გადასცა ძალადობის 22 შემთხვევის მტკიცებულება. ამ ძალადობის შემთხვევებზე ჯერ კიდევ შესაძლებელია სისხლის სამართლის საქმის აღძვრა.
მისი თქმით, ეპისკოპოსებსა და ეკლესიის სხვა მაღალი რანგის მსახურებს ეცნობათ იმ სასულიერო პირების ბრალდებების შესახებ, რომლებიც დღესაც ცოცხლები არიან.
კომისიის შემადგენლობაში იყვნენ ექიმები, სოციოლოგები, ისტორიკოსები და თეოლოგები. ორწლინახევრიანი მუშაობის შედეგად, მათ გამოკითხეს 6 500-ზე მეტი მსხვერპლი და დანაშაულის მოწმე.
რომის კათოლიკური ეკლესიის გამოცემის The Table-ის თანამშრომლის კრისტოფერ ლემის თქმით, სექსუალურ ძალადობასთან დაკავშირებულმა სკანდალმა ეკლესიაში გამოიწვია უდიდესი კრიზისი ბოლო 500 წლის განმავლობაში.
რომის პაპმა ფრანცისკემ შეცვალა საეკლესიო კანონმდებლობა და გაამკაცრა სასულიერო პირების პასუხისმგებლობა სექსუალური ძალადობისთვის.
ახალი წესებით, სექსუალური ძალადობა, არასრულწლოვნების მიმართ გარყვნილი ქმედება, საბავშვო პორნოგრაფიის შენახვა და სექსუალური დანაშაულების დაფარვა საეკლესიო კანონის დარღვევად მიიჩნევა.
