საერთაშორისო უფლებადამცველი ორგანიზაცია "რეპორტიორები საზღვრებს გარეშე" საქართველოს ხელისუფლებას მოუწოდებს, დაუყოვნებლივ დაიწყოს გამჭვირვალე გამოძიება ჟურნალისტებზე მიყურადების ფაქტებზე. ამის შესახებ ორგანიზაციის მიერ გავრცელებულ განცხადებაშია ნათქვამი.
ორგანიზაცია აღნიშნავს, რომ სულ მცირე ხუთმა ქართველმა ჟურნალისტმა დაადასტურა, რომ ისინი იყვნენ ამ უკანონო მიყურადების სამიზნეები.
"ათასობით ფაილი, რომელიც მასობრივი თვალთვალის სავარაუდო ჩანაწერებს მოიცავს, 12 სექტემბერს გაავრცელა პირმა, რომელმაც საკუთარი თავი წარმოადგინა, როგორც სახელმწიფო უსაფრთხოების სამსახურის ყოფილი თანამშრომელი. თვალთვალის ძირითადი სამიზნეები იყვნენ ქართული მართლმადიდებლური ეკლესიის სასულიერო პირები, მაგრამ ასევე დიპლომატები, აქტივისტები და ჟურნალისტები", - ნათქვამია ორგანიზაციის მიერ გავრცელებულ პრესრელიზში.
"ფარული მიყურადების ეს ჩანაწერები, თუ მათი ავთენტიკურობა დადასტურდება, უკიდურესად შემაშფოთებელია მათი მასშტაბის გამო, ასევე არალეგალური და მიუღებელია", - აღნიშნა ჟანა კაველემ, RSF-ს აღმოსავლეთ ევროპისა და ცენტრალური აზიის მიმართულების ხელმძღვანელმა.
"რეპორტიორები საზღვრებს გარეშე" მოუწოდებს საქართველოს ხელისუფლებას, დაუყოვნებლივ შეწყვიტოს უპრეცენდენტო თვალთვალი და უზრუნველყოს პროკურატურის მიერ წამოწყებული გამოძიების სრულიად დამოუკიდებლად და გამჭვირვალედ წარმართვა.
განცხადებაში ასევე ხაზგასმულია, რომ უკანონო თვალთვალის წინა შემთხვევებზე გამოძიება წინ არ წასულა, რაც იმედია, ამჯერად ასე არ იქნება და გამოძიება შედეგებს სწრაფად დადებს.