შეერთებული შტატების კონგრესის წარმომადგენელთა პალატამ მომავალი საფინანსო წლის თავდაცვის ბიუჯეტის პროექტი დაამტკიცა.
კანონპროექტს მხარი 316-მა კონგრესმენმა დაუჭირა, წინააღმდეგ 113 წავიდა.
წარმომადგენელმა პალატამ მხარი დაუჭირა თავდაცვის ბიუჯეტის 778 მილიარდი დოლარით გაზრდას, რაც დაახლოებით 5%-ით მეტია ვიდრე ამას პრეზიდენტი ბაიდენი ითხოვდა.
თავდაცვის ბიუჯეტის კანონპროექტთით ასევე გათვალისწინებულია რუსეთის წინააღმდეგ მკაცრი სანქციები.
ბიუჯეტის პროექტი ამერიკის მოქალაქეებს უკრძალავს რუსეთის სახელმწიფო ობლიგაციებით ოპერაციას/ვაჭრობას არამხოლოდ პირველად, არამედ მეორად ბაზრებზეც.
პროექტი ასევე მოიცავს რეკომენდაციებს რუსეთის 35 მოქალაქის წინააღმდეგ სანქციების დაწესების თაობაზე. ბაიდენის ადმინისტრაცია სანქციების დაწესებას განიხილავს რუს მაღალჩინოსნებზე, სახელმწიფო კომპანიების ხელმძღვანელებსა და მედია მენეჯერებზე. მათ შორის არიან: პრემიერ მინისტრი მიხაილ მიშუსტინი, რუსეთის პრეზიდენტის პრესმდივანი დიმიტრი პესკოვი, პრეზიდენტის ადმინისტრაციის უფროსის პირველი მოადგილე სერგეი კირიენკო, ცენტრალური საარჩევნო კომისიის თავმჯდომარე ელა პამფილოვა, მოსკოვის მერი სერგეი სობიანინი, ბიზნესმენები რომან აბრამოვიჩი, ალიშერ უსმანოვი, ოლეგ დერიპასკა, ასევე Russia Today-ის მთავარი რედაქტორი მარგარიტა სიმონიანი, ტელეწამყვანი ვლადიმერ სოლოვიოვი, პირველი არხის გენერალური დირექტორი კონსტანტინ ერნსტი და სხვები.
ამ სიაში შემავალ პირთა სანქცირების ინიციატივით ოპოზიციონერ ალექსეი ნავალნის თანამებრძოლები გამოვიდნენ, რომელთაც პირთა ჩამონათვალი ევროკავშირისა და აშშ-ის წარმომადგენლებს 2021 წლის თებერვალში გადასცეს.
გარდა ამისა, თავდაცვის ბიუჯეტის პროექტი ითვალისწინებს ახალ სანქციებს "ჩრდილოეთის ნაკადი 2"-ის წინააღმდეგ. თუ ეს პროექტს სენატიც დაამტკიცებს, აშშ -ის პრეზიდენტი ვალდებული იქნება, მისი ძალაში შესვლიდან არა უგვიანეს 15 დღისა, შეზღუდვები დაუწესოს ყველა იმ პირსა და კომპანიას, რომლებიც ჩართულნი არიან გაზსადენის საქმიანობასა და მშენებლობაში.
თავდაცვის ბიუჯეტის პროექტი დასამტკიცებლად სენატს წარედგინება, რომელსაც საკუთარი ვერსია აქვს მომზადებული. საბოლოო პროექტი კონგრესის ორ პალატას შორის უნდა შეთანხმდეს, შემდეგ კი პრეზიდენტს ხელმოსაწერად გადაეგზავნოს.