როგორ შეიძლება, ჯანდაცვის სამინისტროს პოზიცია პოზიტიური იყოს იმგვარ ქმედებასთან მიმართებით, რომელიც ნებსით თუ უნებლიეთ ვაქცინაციას აზარალებს, - ამის შესახებ ჯანდაცვის მინისტრის მოადგილემ, თამარ გაბუნია ვაქცინაციის ბანერების ე.წ. "სისხლიანი ბანერებით" გადაფარვასთან დაკავშირებით განაცხადა.
მისი განცხადებით, ვაქცინაციის კამპანიას სჭირდება კიდევ უფრო გაძლიერება და არა გადაფარვა ნებისმიერი სხვა ალტერნატიული თემით.
"ვაქცინაციის კამპანიას კიდევ უფრო მეტად გაძლიერება სჭირდება და არა გადაფარვა სხვა ნებისმიერი, ალტერნატიული თემით, რაც არ უნდა მნიშვნელოვანი იყოს ეს თემა. გნებავთ სოციალური, ეკონომიკური და პოლიტიკური მიზნებიდან გამომდინარე. ამდენად, ვაქცინაციის კამპანია სრული სიმძლავრით რომ უნდა გაგრძელდეს, ცალსახად, ჯანდაცვის სამინისტრო და დაავადებათა კონტროლის ცენტრი ამ პოზიციას ემხრობიან. ის, რომ ბოლო დღეების განმავლობაში აქცენტი გაკეთდა პოლიტიკური ბანერებით ვაქცინაციის ბანერების გადაფარვაზე, ეს ყველაფერი გასაგებია და კიდევ უკეთესი იქნება, მედიაში მეტი აქცენტი გაკეთდეს თავად, უშუალოდ ვაქცინაციის თემებზე, რადგან სხვაგვარად ჩვენ ვერ დავუბრუნდებით და ვერ ავიღებთ იმ ტემპს, რომელიც ვაქცინაციით გვინდა მივიღოთ", - განაცხადა გაბუნიამ.
თბილისში 17 სექტემბერს, გვიან ღამით გამოჩნდა ბანერები წარწერით "არა ნაცებს! არა ბოროტებას! არა ღალატს!", სადაც გამოსახულები არიან გუბაზ სანიკიძე, ნიკა მელია, ნოდარ მელაძე, ზურაბ ჯაფარიძე, მიხეილ სააკაშვილი, ნიკა გვარამია, გიორგი გახარია.
დაავადებათა კონტროლის ეროვნული ცენტრი ბანერების საკითხს განცხადებით გამოეხმაურა, სადაც აღნიშნულია, რომ უწყება ფაქტს გმობს.
