რუსეთის ცენტრალური საარჩევნო კომისიის ინფორმაციით, ბიულეტენების 8.89%-ის დათვლის შედეგად, დუმის არჩევნებში ხმათა 38.51%-ით ლიდერობს მმართველი პარტია "ედინაია რასია".
წინასწარი მონაცემებით, მეორე ადგილზე გავიდა კომუნისტური პარტია, რომელმაც ამ დროისთვის ხმების 25.91% მოაგროვა. მას მოსდევს ლიბერალ-დემოკრატიული პარტია 9.61%-ით, "სამართლიანი რუსეთი - პატრიოტები სიმართლისთვის" - 6.68%.
კენჭისყრა დასრულდა და საარჩევნო უბნები დაიხურა მოსკოვის დროით 21:00 საათზე. დუმის არჩევნებში კენჭისყრა 3 დღის განმავლობაში მიმდინარეობდა - 17-დან 19 სექტემბრის ჩათვლით.
სახელმწიფო დუმის წევრებთან ერთად, რუსეთის მოქალაქეებმა ქვეყნის ცხრა სუბიექტის გუბერნატორი და 39 რეგიონული პარლამენტის წევრებიც აირჩიეს.
დუმის არჩევნებში 14 პოლიტიკური პარტია მონაწილეობდა.
რუსეთის ტერიტორიაზე 108 მილიონზე მეტი ამომრჩეველია რეგისტრირებული, ხოლო საზღვარგარეთ 2 მილიონზე მეტი.
ქვეყნის ტერიტორიაზე არჩევნები ფართომასშტაბიანი გაყალბების ბრალდებების ფონზე წარიმართა. სოციალურ ქსელში ვრცელდება ვიდეობი, სადაც ასახულია, თუ როგორ ყრიან საარჩევნო ურნებში სხვადასხვა პირები ბიულეტენებს.
ცოტა ხნით ადრე, რუსეთში მიიღეს კანონი, რომლის თანახმადაც არჩევნებში მონაწილეობა აეკრძალათ "ექსტრემისტული ორგანიზაციის" წევრებსა და მათთან დაკავშირებულ პირებს. რუსი ოპოზიციონერის ალექსეი ნავალნის ორგანიზაცია ექსტრემისტულ ორგანიზაციადაა გამოცხადებული, შესაბამისად მას და მასთან კავშირში მყოფ ყველა პირს უარი ეთქვა არჩევნებში მონაწილეობაზე.
აღსანიშნავია, რომ კორონავირუსის პანდემიის საბაბით, რუსეთის ხელისუფლებამ მკვეთრად შეზღუდა საპარლამენტო არჩევნებზე უცხოური საერთაშორისო ორგანიზაციების სადამკვირვებლო მისიების წევრთა რაოდენობა. ცოტა ხნის წინ ცნობილი გახდა, რომ ეუთო/ოდირს მხოლოდ 60 დამკვირვებლის წარგზავნის უფლება მიეცა, რის გამოც ორგანიზაციამ საერთოდ უარი თქვა რუსეთში სადამკვირვებლო მისიის განხორციელებაზე.
რუსეთის საარჩევნო სისტემა შერეულია - პროპორციულ-მაჟორიტარული. საკანონმდებლო ორგანოს ქვედა პალატა, სახელმწიფო დუმა 450 წევრისგან შედგება. მათგან ნახევარი, 225 პარტიული სიით აირჩევა, დარჩენილი 225 კი ერთმანდატიანი ოლქებიდან.