გერმანიის ელჩი ჩინეთში იან ჰეკერი, რომელმაც დიპლომატიური თანამდებობა ორი კვირის წინ დაიკავა, პეკინში მოულოდნელად გარდაიცვალა. ინფორმაცია გერმანიის საგარეო საქმეთა სამინისტრომ გაავრცელა.
როგორც გერმანული სააგენტო DPA იუწყება, ელჩის გარდაცვალების გარემოებები გაურკვეველია. ფრანგული სააგენტო AFP ეცადა, გაერკვია დამატებითი დეტალები, თუმცა საგარეო უწყებამ დასმულ შეკითხვებს არ უპასუხა.
"ღრმა მწუხარებით შევიტყვეთ, გერმანიის ფედერაციული რესპუბლიკის ელჩის მოულოდნელი გარდაცვალების შოკისმომგვრელი ინფორმაცია. ჩვენი ფიქრებით მის ოჯახთან და საყვარელ ადამიანებთან ვართ", - ამ განცხადებით შემოიფარგლა გერმანიის საგარეო უწყება.
54 წლის იან ჰეკერი ბოლო დრომდე საგარეო პოლიტიკის საკითხებში, გერმანიის ფედერალური კანცლერის, ანგელა მერკელის მრჩევლად მუშაობდა. 2017 წლიდან ის ხელმძღვანელობდა კანცლერის საგარეო პოლიტიკის, უსაფრთხოების პოლიტიკისა და სოციალურ-ეკონომიკური განვითარების დეპარტამენტს.
გერმანული მედიის ცნობით, ჰეკერი ანგელა მერკელის ნდობით აღჭურვილი პირი იყო.
იან ჰეკერი პეკინში მეუღლესთან ერთად აგვისტოში ჩავიდა და კორონავირუსის პანდემიის გამო ჩინეთის მთავრობის მიერ დაწესებული კარანტინიც გაიარა.
