"საქართველოს ავიახაზების" თვითმფრინავი, რომელსაც აფრენის შემდეგ ტექნიკური პრობლემა შეექმნა, თბილისის საერთაშორისო აეროპორტში უსაფრთხოდ დაფრინდა.
თვითმფრინავს თბილისი-ვენის რეისი უნდა შეესრულებინა, თუმცა ტექნიკური პრობლემის გამო, დედაქალაქის ცაზე დაფრინავდა და კვლავ თბილისის აეროპორტში დაფრენას ცდილობდა.
"საქართველოს ავიაზახების" გენერალური დიექტორმა, თამაზ გაიაშვილმა "ჯი-ეიჩ-ენს" უთხრა, რომ "არაფერი ხდება". თუმცა, რატომ ვერ შესრულდა რეისი და რატომ დაეშვა თვითმფრინავი კვლავ უკან, ამაზე საუბარი არ ისურვა.
თვითმფრინავმა, აფრენის შემდეგ შასი ვერ დახურა, რის გამოც, ფრენას ვერ განაგრძობდა. პილოტი იძულებული იყო თვითმფრინავი საწვავისგან დაეცალა და თბილისის აეროპორტში დაფრენილიყო.
თვითმფრინავი დაახლოებით 2- საათიანი მცდელობის შემდეგ თბილისის აეროპორტში უსაფრთხოდ დაფრინდა. მანამდე კი ის დედაქალაქის თავზე ტრიალებდა.
მოგვიანებით, თბილისი-ვენის რეისთან დაკავშირებით ავიაკომპანიამ განცხადება გაავრცელა:
"დღევანდელი რეისი - A9 681 თბილისი-ვენა - შესრულდა მოგვიანებით. მიზეზი გახდა ტექნიკური პრობლემა, რის გამოც პილოტი იძულებული გახდა 2 საათის განმავლობაში ეფრინა თბილისის თავზე, რათა დაეწვა გარკვეული რაოდენობის საწვავი, სანამ დაეშვებოდა.
მადლობას ვუხდით ჩვენს მფრინავებს, თემურ თოლომაშვილს და გიორგი გიუნაშვილს, რომლებმაც მოახერხეს 180 მგზავრით სავსე ხომალდის უსაფრთხოდ დასმა თბილისის აეროპორტის ტერიტორიაზე!
ტექნიკური შემოწმების შემდეგ, თვითმფრინავმა მიიღო მწვანე შუქი და შეძლო გაფრენა ვენაში, მხოლოდ 45 წუთის შემდეგ! კიდევ ერთხელ მადლობას ვუხდით ჩვენს პილოტებს და ტექნიკურ გუნდს, გაწეული სამსახურისა და პროფესიონალიზმისთვის!", - ნათქვამია გავრცელებულ განცხადებაში.
