ბელარუსის უზენაესი სასამართლოს გადაწყვეტილებით, ლიკვიდირებულად გამოცხადდა ბელარუსის პენცენტრი, რომელსაც 2019 წლიდან სათავეში ედგა ნობელის პრემიის ლაურეატი, მწერალი სვეტლანა ალექსიევიჩი. ინფორმაცია პენცენტრმა გაავრცელა.
"სასამართლოს გადაწყვეტილების შედეგად, ბელარუსის პენცენტრი ლიკვიდირებულია", - წერს ორგანიზაცია ტელეგრამის არხზე.
უზენაეს სასამართლოს პენცენტრის ლიკვიდაციის მოთხოვნით, ბელარუსის იუსტიციის სამინისტრომ 22 ივლისს მიმართა.
ბელარუსის პენცენტრი 1989 წელს დაფუძნდა.
პენცენტრის ლიკვიდაცია ნაწილია ბელარუსის ავტორიტარი ლიდერის რეპრესიული პოლიტიკისა, რომლის ფარგლებშიც, ქვეყანაში ათობით ადგილობრივი და საერთაშორისო არასამთავრობო ორგანიზაციის წარმომადგენლობა დაიხურა.
ლუკაშენკას განკარგულებით, ქვეყანაში 60-მდე არასამთავრობო ორგანიზაცია დაიხურა. ბოლო ინფორმაციით, ბელარუსში საქმიანობა შეწყვიტა გოეთეს ინსტიტუტმა.
ბელარუსის ხელისუფლება მასობრივად დევნის თავისუფალ მედიასა და არასამთავრობო ორგანიზაციებს. ბოლო რამდენიმე კვირაა, ბელარუსის საგამოძიებო კომიტეტი ჩხრეკას ატარებს ჟურნალისტებისა და უფლებადამცველების სახლებში. დაპატიმრებულია ათეულობით ჟურნალისტი.
გაეროს ადამიანის უფლებათა უმაღლესმა კომისარმა მიშელ ბაჩელეტმა დაგმო ბელარუსში მიმდინარე მოვლენები და მათ "გაუგონარი ანგარიშსწორება" უწოდა. მინსკის ქმედებები მედიისა და არასამთავრობო ორგანიზაციის მიმართ დაგმეს ვაშინგტონმა და ბრიუსელმა.
