Snickers-ის ესპანეთის წარმომადგენლობა ბოდიშს იხდის სატელევიზიო რეკლამისთვის, რომელიც ჰომოფობიური შინაარისს გამო მკაცრად გააკრიტიკეს.
სნიკერსმა სოციალურ ქსელში გამოაქვეყნა განცხადება, სადაც ბოდიშს იხდის იმ "გაუგებრობისთვის, რომელიც შესაძლოა ახალმა სარეკლამო კამპანიამ გამოიწვია".
კომპანიის განცადებით, რეკლამა მიზნად არ ისახავდა რომელიმე ადამიანის ან ჯგუფის შეურაცხყოფას.
"ვწუხვართ ამ გაუგებრობისთვის, რომელიც ამ რეკლამის ირგვლივ წარმოიშვა. ვინაიდან გვსურს, რომ თავიდან ავიცილოთ ისეთი შეტყობინების გავრცელება, რომელიც შესაძლოა, არასწორად იქნეს აღქმული, დაუყოვნებლივ შევაჩერებთ სარეკლამო კამპანიას", - ნათქვამია განცხადებაში.
20-წამიან სარეკლამო რგოლში ჩანს, რომ ესპანელი ინფლუენსერი ალეს გიბაია სნიკერსის ჭამის შემდეგ მოულოდნელად წვერიან მამაკაცად გარდაიქმნება.
ალეს გიბაია მეგობართან ერთად სანაპიროზეა, სადაც მიმტანს სთხოვს "ფორთოხლის სექსუალურ წვენს A, B და C ვიტამინებით". მიმტანი კი, რომელიც დაბნეულად გამოიყურება, წვენის ნაცვლად სნიკერსის ნაყინს სთავაზობს, რომლის მოკბეჩის შემდეგ, გიბაია წვერიან კაცად გადაიქცევა.
"უკეთესია?" - ეკითხება მეგობარი გიბაიას, რომელიც პასუხობს, რომ "უკეთესია". პარალელურად კი სარეკლამო რგოლში გაისმის სლოგანი "როდესაც გშია, შენ შენს თავს არ გავხარ".
რეკლამამ გამოიწვია ბრალდებების ტალღა სოციალურ მედიაში, რომ ბრენდი შეურაცხყოფს გეი მამაკაცებს.
"სამარცხვინო და სამწუხაროა, რომ ამ ეტაპზე კიდევ არსებობენ კომპანიები, რომლებიც აგრძელებენ სტერეოტიპების განმტკიცებას და ხელს უწყობენ ჰომოფობიას", - წერს ლესბოსელების, გეებისა და ბისექსუალების სახელმწიფო ფედერაცია.
კრიტიკას შეუერთდა ესპანეთის თანასწორობის მინისტრი ირენ მონტეროც.
"მაინტერესებს ვის შეიძლება ეგონოს, რომ ჰომოფობია, როგორც ბიზნეს სტრატეგია, კარგი იდეაა", - დაწერა მან Twitter- ზე.
